Bursat evropiane pësojnë rënie

Janë zgjuar në rënie bursat europiane një ditë pas takimit të presidentit francez, Nicholas Sarkozy dhe kancelares gjermane, Angela Merkel në Paris, për të diskutuar mënyrat e frenimit të krizës së borxhit në Eurozonë, në kohën kur edhe Gjermania ka bërë publike shifra zhgënjyese të rritjes ekonomike. Tregjet në mbarë botën nuk e priten mirë deklaratën e përbashkët të udhëheqësve europianë, ku shumë prej investitorëve prisnin prej tyre një përgjigje më të fortë. Indeksi i Frankfurtit “Dax” ra me 1.7%, ndërsa treguesit “Cac 40” në Paris dhe “FTSA” e Londrës humbën rreth 1%. Premtimi për një taksë transaksionesh goditi gjithashtu aksionet e bankave Deutsche Bank, BNP Paribas dhe Barclays që ranë me rreth 3%.
Çmimi i arit ka arritur një rekord të ri, duke reflektuar pasigurinë e vazhdueshme. Presidenti francez Nikolas Sarkozy tha se Franca dhe Gjermania kanë rënë dakord për të paraqitur propozimet e tyre në shtator, ndërsa qeverisje e përbashkët e politikës ekonomike. Sarkozy theksoi se dy vendet do të propozojnë një organ qeverisës të Eurozonës, përfshirë presidentin me mandat prej dy vjet e gjysme, për të rikthyer besimin e tregut. Udhëheqësi francez tha se organi më i ri do të përbëhet nga kryetarët dhe kryeministrat e te gjitha vendeve të Eurozonës, ndërsa sygjeroi se lideri i parë duhet të jetë presidenti aktual i BE-së Herman Van Rompuj.
Dy ditë më parë shefja e Fondit Monetar Ndërkombëtar, Kristina Largard deklaroi se për vendet që janë në krizë ekonomike nuk është e rëndësishme vetëm balancimi i borxheve, e domosdoshme është dhe rritja ekonomike. Apeli që FMN thekson se ekonomitë e zhvilluara në botë të mos përqendrohen vetëm në luftën kundër borxheve.
Por komisioni i BE-së ka përshëndetur konceptin gjermano-francez për stabilizimin e Eurozonës. Presidenti i Komisionit të BE-së José Manuel Barroso dhe Komisioneri për Fianancat, Olli Rehn deklaruan se propozimet e paraqitura nga kancelarja Angela Merkel dhe presidenti Nicolas Sarkozy për një menaxhim më të mirë krizës janë një hap para dhe një kontribut politik i rëndësishëm i të dyja vendeve më të mëdha të Eurozonës. Takimi i Parisit, vjen pas një jave tensionesh në tregje financiare, ku ndjehet frika e një recesioni tjetër si dhe është vënë në pikëpyetje aftësia e Italisë dhe Spanjës për të shlyer borxhin e tyre. Si Franca dhe Gjermania, po ushtrojnë presion ndaj të ashtëquajturave ekonomi periferike për të shtuar masat për të balancuar buxhetet.