COP29 – Podesta: SHBA nuk do ta braktisë luftën kundër ndryshimeve klimatike

BAKU, 11 nëntor /ATSH-AFP/ – John Podesta, emisari amerikan i presidentit demokrat në largim Joe Biden në COP29 në Baku kërkoi sot që të siguronte botën se Shtetet e Bashkuara nuk do ta braktisin luftën kundër ndryshimit të klimës, pavarësisht ardhjes së afërt në pushtet të skeptikut klimatik, Donald Trump.

“Edhe pse qeveria federale e SHBA-së nën drejtimin e Donald Trump ndalon veprimet klimatike, puna për të përmirësuar ndryshimet klimatike do të vazhdojë në Shtetet e Bashkuara me përkushtim, pasion dhe besim”, tha John Podesta në një konferencë për shtyp.

Administrata Demokrate siguron përfaqësimin amerikan në negociatat COP29, me Donald Trump që merr pushtetin më 20 janar.

Prandaj, Shtetet e Bashkuara po negociojnë, edhe nëse ndonjë angazhim nga ana e tyre dobësohet nga alternimi i ardhshëm.

”Në janar, ne do të kemi një president, marrëdhënia e të cilit me ndryshimet klimatike kalon përmes fjalëve mashtrim dhe lëndë djegëse fosile. Ai ka premtuar të zhbëjë mbrojtjen tonë mjedisore dhe të nxjerrë Shtetet e Bashkuara nga marrëveshja e Parisit përsëri”, pranoi John Podesta.

“Kjo është ajo që ai tha, ne duhet ta besojmë atë”, shtoi ai.

“Ne jemi këtu në COP29 për të vazhduar punën së bashku me partnerët tanë globalë dhe palët e tjera”, tha ai.

John Podesta më pas theksoi veprimet që mund të ndërmerren nga shtetet e ndryshme amerikane si dhe “qytetet, sipërmarrësit tanë, bizneset tona dhe qytetarët tanë”.

Një pjesë e rëndësishme e veprimit klimatik mund të vendoset në nivel shtetëror, për shembull me standardet e automjeteve, siç ka bërë Kalifornia.

Por, rreziku mbetet i madh që në nivel federal, qeveria e ardhshme do të tërheqë shumë standarde për emetimet e gazeve serrë, veçanërisht për termocentralet me qymyr./ a.jor.