Cana, mes intrigave të Lionit dhe Paris Sën Zhermenit

Albania Sport (AS) - Pas fitores 3-1 të Olimpikut të Marsejës me Okser, në javën e 21 të Ligë franceze, skuadra e Lorik Canës, e cila ndodhet në vendin e dytë do të përballet të shtunën në transfertë me La Mans, ekipin që zë vendin e dhjetë në klasifikim. Marseja tashmë e kaloi fazën e errët që përjetoi në mesin e fazës së parë, duke synuar qartë jo vetëm një vend në Ligën e Kampioneve për sezonin e ardhshëm, por edhe pse me diferencë prej -16 pikësh nga Olimpiku i Lionit, u bën presion pesë herë kampioneve të Francës. Skuadra e Lorik Canës, meshfushorit shqiptar që është shndërruar në një pikë referimi për Marsejën, do të luftojë fort për të regjistruar fitoren e katër rresht, përpara se të ndeshet javën e ardhshme me Paris Sën Zhermen, ekipin ku është formuar Cana si futbollist. Pas rikthimit të Sise dhe rigjetjes së formës nga ana e Frank Riberi (2 gola kundër Okser), olimpienët kanë marrë ngjyrat e një ekipi të pathyeshëm. Për shqiptarin Lorik Cana, dhjetë ditët e ardhshme janë të vecanta. Të mërkurën do të ndeshet me Olimpikun e Lionit në Kupën e Francës, vetëm pak ditë pasi janë bërë publike preferencat e trajnerit të Lionit, Zherar Hulier, ndërsa të dielën e ardhshme ai do të jetë kundër Paris Sën ZHermenit në kampionat, ekipin ku është rritur si futbollist. Dy sfida intriguese për lojtarin më të mirë të Kombëtares shqiptare.