Cana rrëfen dështimin ndaj PSG

Olimpiku i Marsejës u mund 2-4 në shtëpinë e tij nga Paris SG dhe njeriu më i mërzitur në kampin marsejez nuk kishte se si të ishte tjetër veç Lorik Canës.

Jo vetëm për faktin se është kapiteni i Olimpikut, por edhe sepse përballë kishte ish-skuadrën, e cila e “mallkoi” pas largimit drejt Marsejës.

“Një nga ato mbrëmje që janë të vështira për t’u harruar”, tha dje shqiptari për “Om.net”. “Ne dëshironim të merrnim 3 pikët, e dinim rëndësinë e kësaj ndeshjeje dhe e donim fitoren menjëherë pas humbjes në Ligën e Kampionëve. E kontrolluam mirë pjesën e parë, por barazimi në të dytën na tronditi, na dëmtoi. Ishim pak të paorganizuar, pas atij momenti dhe menjëherë gjithçka na u ndërlikua. Megjithatë mbetemi kandidatë për titull. Do të japim maksimumin në çdo ndeshje. Nuk mendoj se bëhet fjalë për humbje të luftës. Është çështje krenarie dhe ne do të ringrihemi përsëri”.