Tërbuni kërkon ndëshkim masa për Laçin

Drejtuesit e Klubit Tërbuni të Pukës dhe Bashkia Pukë kanë reaguar ashpër, duke kërkuar marrjen e masave të rrepta disiplinore ndaj drejtuesve të Klubit të futbollit të Laçit një ditë pas incidentit të ndodhur në stadiumin “Smail Xhemali”, ku ndeshja e futbollit mes ekipeve të Tërbunit të Pukës dhe Laçit të Kurbinit ka degjeneruar në grushte e kërcënim me armë.

Ashtu siç kanë deklaruar të pranishmit në stadium dhe nga njoftimi zyrtar i Drejtorisë së Policisë së Qarkut Shkodër, mësohet se i gjithë sherri është krijuar nga presidenti i Klubit të Laçit, Pashk Laska, i cili ka hyrë në fushë, duke goditur dhe sharë kapitenin e skuadrës kundërshtare dhe më pas duke sharë me fjalë e gjeste banale tifozët e Pukës.

Ndërsa kushëriri i presidentit të Klubit të Laçit, Zef Laska, punonjësi i policisë bashkiake në Laç, ka vazhduar më tej sherrin, duke kërcënuar me armë tribunën VIP, ku ndodhej edhe kryetari i Bashkisë së Pukës.

Kryetari i Bashkisë së Pukës, Rrustem Struga, thotë se “punonjësi i policisë bashkiake të Laçit është afruar te tribuna VIP dhe ka kërcënuar duke vënë dorën në pistoletë, por pa e nxjerrë dhe më pas ka nisur të ofendojë me fjalët nga më banalet, duke tentuar t’i afrohet tribunës, por më pas është ndalur nga policia”.