Champions kater ekipe prane kualifikimit

Barcelona, Manchester United, Porto dhe surpriza e këtij edicioni, Malaga kanë shansin që duke fituar në sfidat respektive të jenë katër skuadrat e para që do të sigurojnë një biletë për në turin pasardhës të Champions League.

Të katërta këto skuadra i kanë fituar tre ndeshjet e zhvilluara deri më tani në fazën e grupeve dhe nëse regjistrojnë edhe fitoret e katërta, ato do të kualifikoheshin për në turin e 1/8-ave dy ndeshje përpara fundit të fazës së grupeve.

Nëse marrin pikët e plota, edhe Schalke, Borussia Dortmund dhe Shakhtar Donetsk mund të bëjnë hapa të rëndësishëm përpara drejt kalimit në turin tjetër. Ndërkohë, Chelsea, kampione e Europës në fuqi, Manchester City skuadra e milionave dhe kampionët e Italisë, Juventusi, e shohin veten në pozita aspak komode.

Pas fitoreve me Olympiakos-in dhe Arsenalin dhe barazimit me Montpellier, tashmë Schalke do të luajë sërish me skuadrën e Arsen Ëenger, rivalët direkt të grupit B. Me një fitore gjermanët do të ngjiteshin në kuotën e 10 pikëve, duke hipotekuar kualifikimin, ndërsa do të bënin që “topçinjtë”  të rrezikonin seriozisht.

Nga katër skuadrat që mund të sigurojnë kualifikimin, dy prej tyre luajnë në mbrëmjen e sotme. Gjithçka duket më e lehtë për Porton në Grupin A, që sot luan në fushën e Dynamo Kyiv, ndërsa Malaga që kryeson Grupin C ndodhet përballë testit të vështirë në fushën e Milanit.

Barcelona në Grupin G dhe Manchester United në Grupin H do të luajnë të mërkurën në transfertat kundër Celtic dhe Bragas. Fitoret do të mbyllnin çdo diskutim, por edhe barazimet jashtë fushe do ti shërbenin katalanëve dhe “Djajve të Kuq”.