Davutoglu: Turqia, përgatitet për bllokadën në Gaza

Ministri i Jashtëm i Turqisë, tha se shteti i tij po përgatitet për të paraqitur çështjen e bllokadës izraelite në Gaza para Gjykatës Ndërkombëtare të Drejtësisë.
 

Ahmet Davutoglu, në një intervistë televizive ka deklaruar se Ankaraja nuk e njeh bllokadën dhe se javën e ardhshme do të nis procedurat për të dëshmuar joligjshmërinë e kësaj bllokade në gjykatën në Hagë. Komenti i tij pason kërkesën për riparimin e marrëdhënieve të cilën sekretari gjeneral i OKB-së, Ban Ki Moon, u drejtoi të dyja vendeve.
 

Të premten, Turqia dëboi të dërguarin e Izrealit në Ankara, ndërsa pezulloi bashkëpunimin ushtarak me këtë vend. Reagimi i Turqisë erdhi pas publikimit të një raporti të Kombeve të Bashkuara mbi vrasjen e nëntë turqve gjatë bastisjes së një flote ndihmëse e cila po lëvizte drejt Rripit të Gazës. Izraeli ka shprehur keqardhjen për incidentin që daton në maj të vitit 2010, por ka refuzuar të kërkoj falje për atë që ndodhi.