Deklarata/Basha: Shtatori muaj aktiv për demokratët, bëhet analiza dhe përzgjidhen strukturat e reja drejtuese

Kryetari i Partisë Demokratike, Lulzim Basha paralajmëroi gjithashtu se shtatori do të jetë një muaj aktiv për demokratët, të cilët përveç analizës për rezultatin e zgjedhjeve te 23 qershorit , në muajt në vijim do të bëjnë përzgjedhjen e strukturave drejtuese të partisë. Duke iu përgjigjur interesit të mediat, Basha tha se muajin e ardhshëm do të zhvillohet analiza e cila do të pasohet nga përgatitjet për zgjedhjen e forumeve të degëve dhe që do të çojë në mbledhjen e Kuvendit Kombëtar dhe zgjedhjen e Këshillit Kombëtar dhe Kryesisë së re, në kohën e parashikuar në statut. Edhe pse preferoi të mos bëjë publik asnjë nga emrat që pritet të mbajnë pozicione drejtuese në strukturat e selisë blu, Basha garantoi se përzgjedhjet do të bëhen mbi bazën e meritës dhe kontributeve në këtë forcë politike.

Z.Basha, kur pritet që të mblidhni kryesinë e re të Partisë Demokratike?
Strukturat drejtuese të Partisë Demokratike do të angazhohen në një proces sipas parashikimeve statutore që do të nisë në muajin shtator në të gjithë degët e Partisë Demokratike. Një proces analize dhe përgatitjet më zgjedhjen e forumeve të degëve dhe që do të çojë në mbledhjen e Kuvendit Kombëtar dhe zgjedhjen e Këshillit Kombëtar dhe Kryesisë së re, në kohën e parashikuar në statut. Dhe për këtë po bëhen hapat e parë të përgatitjes.

Z. Basha, a keni një emër në mëndje për Kryetarin e grupit parlamentar apo do të prisni të mblidhet Kuvendi që të vendoset si propozim i grupit?
Unë po kryej konsultimet e nevojshme me drejtues, anëtarë të Kryesisë, anëtarë të grupit të ri parlamentar të Partisë Demokratike dhe në kohën e duhur do të bëhet i njohur edhe vendimi përsa i përket strukturës drejtuese të grupit tonë Parlamentar.

Si do ta koordinoni, menaxhoni në këtë kohë të mbetur zgjedhjen e strukturave të reja? Do të bashkëpunoni me zyrtarët aktualë dhe drejtuesit në detyrë apo edhe me rivalin tuaj, z. Olldashi?
Duke u bazuar në parimet që kam shpallur gjatë gjithë kësaj kohe, të punës, kontributit, përkushtimit dhe vlerësimit të këtyre tre elementëve për çdo drejtues dhe anëtar të Partisë Demokratike.