Dhurata e ndihma nga Ministria e Punes

Ndonëse të privuar në shumë aspekte, edhe fëmijët romë kanë festuar dje me rastin e festave të fundvitit, njësoj si bashkëmoshatarët e tyre. Vogëlushët e mbledhur nga çerdhe, kopshte e shkolla të ndryshme kanë marrë pjesë dje në një koncert festiv, ku ishin të pranishëm edhe autoritetet e Ministrisë së Punës. Ata premtuan se gjatë vitit 2011 do të zbatohen projekte edhe më të rëndësishme për integrimin e këtij komuniteti, me qëllim që këta fëmijë të mos ndihen të diskriminuar, por të bashkëjetojnë në kushte të ngjashme me ato të vogëlushëve të tjerë. Në prag të festave u shpërndanë dhurata e ndihma edhe për komunitetin rom në zonat e përmbytura të Shkodrës.

“Janë ditë që nxisin solidaritetin, bashkëpunimin midis të gjithë shoqërisë shqiptare. Është ndihmuar komuniteti rom, i cili është i prekur nga përmbytja në Shkodër, janë dhënë ndihma, mbështetje financiare dhe mbështetje e gjithanshme për këtë komunitet”, tha zv.ministrja e Punës, Filloreta Kodra.

Ndërkohë, koncerte të tjera festive, ku do të përfshihen fëmijë të këtij komuniteti, pritet të organizohen edhe në qytete të tjera të Republikës së Shqipërisë.