Dule propozon te Berisha ministrin e ri, Barka: Kam mbështetjen e kryeministrit

Kryetari i PBDNJ, Vangjel Dule, ka marrë dje kontakt me kryeministrin e vendit, Sali Berisha, të cilit i ka kërkuar shkarkimin e ministrit aktual të Punës dhe Çështjeve Sociale, Kosta Barka. Vetë Dule ka dalë në një konferencë për shtyp, ku ka zbardhur dhe emrin e ri të ministrit që do të zëvendësojë Barkën. Ai është Andrea Marto, ish-Sekretari i Përgjithshëm i Ministrisë së Punës, i shkarkuar pak kohë më parë nga ministri Barka. Dule gjatë fjalës së tij u shpreh se zëvendësimi i Barkës bëhet në kuadër të reformave, të cilat, sipas tij, nuk po ecin si duhet në Ministrinë e Punës. “Kryeministri Berisha pranoi propozimin për shkarkimin e Kosta Barkës. Për postin e ministrit të Punës dhe Çështjeve Sociale propozuam Andrea Marton. Ndryshimi i ministrit bëhet për të bërë reformat që deri tani nuk janë bërë. Reformat në fushën sociale nuk kanë ecur ashtu siç duhet”, - ka pohuar Dule. Gjithsesi, arsyeja e shkarkimit të Kostës duket se ka qenë pikërisht shkarkimi i Martos para disa kohësh nga Ministria e Punës, dhe konfliktet që Barka dhe Dule kanë mes tyre brenda PBNDJ për shkak të ndikimit që Dule kërkon të ketë në Ministrinë e Punës dhe në emërimet atje. Gjithsesi, në fjalën e tij Dule ka folur dhe në lidhje me aleancat e ardhshme për zgjedhjet e përgjithshme. Dule tha se për të vendosur se në cilin koalicion do të bëjë pjesë, do të presë dhe hartimin e Kodit të ri Elektoral.

Barka

Ndërkohë, në lidhje me shkarkimin ka reaguar dhe ministri Kosta Barka, i cili është shprehur se në lidhje me vendimin e Dules është njoftuar nëpërmjet medias. Barka i hodhi poshtë pretendimet e Dules në lidhje me këtë çështje, kur tha se në institucionin që ai ka drejtuar ka bërë reforma të thella. Barka u shpreh se ka qenë ministër i suksesshëm dhe se për projektet e së ardhmes ka siguruar dhe mbështetjen e kryeministrit Berisha “Kërkesën e kryetarit të partisë për largimin tim nga posti i ministrit e kam mësuar nga media. Unë di se jam ministër, kam bërë një reformim të plotë të gjithë sistemit të mbrojtjes sociale dhe për projektet në të ardhmen kam siguruar edhe mbështetje të kryeministrit Berisha. Jam i predispozuar për t’iu përgjigjur të gjitha detyrimeve institucionale që kam dhe si ministër jam në performancën më të mirë për t'iu përgjigjur qytetarëve shqiptarë, në mënyrë të veçantë grupeve në nevojë”, - tha Barka. Në lidhje me shkarkimin e Sekretarit të Përgjithshëm të Ministrisë së Punës, Barka u përgjigj se ky i fundit nuk iu përgjigj me punën e tij detyrimeve shtetërore. “Marto nuk iu përgjigj detyrimit institucional dhe si person përgjegjës para qeverisë vendosa largimin e tij, sepse jam i detyruar t'i përgjigjem detyrimeve si ministër që të shëndosh administratën shtetërore”, - tha Barka.