Durres aksion per ujerat e zeza

Një ditë pas kronikës problematike të ngritur në media, inspektorë të mjedisit si dhe të drejtorisë së ujësjellës-kanalizimeve në Durrës kanë nisur punën në terren për ndërprerjen e tubacioneve të ujerave të zeza që shkarkohen në det, por edhe për zhbllokimin e pusetave në bllokun e pallateve në sektorin Apollonia. Drejtori i drejtorisë rajonale të mjedisit Durrës, Ramzan Kalia i pranishëm në aksionin e ndërmarrë shprehet se do të ketë penalizimeve me gjoba deri në ndjekje penale jo vetëm për njësitë vendore por edhe për ndërtuesit, të cilët tentojnë të shkarkojnë ujerat e zeza në det.
Franc Stajka Drejtori Teknik i Ujësjellësit, për këtë situatë përveçse ndërtuesit bën përgjegjës edhe bashkinë e qytetit, e cila ka dhënë lejen e shfrytëzimit pa plotësuar kriteret.
Dhënia pa kriter e lejeve të ndërtimit nga ana e bashkisë së Durrësit nder vite ka krijuar vatra të shumta ndotjeje të ujërave të Adriatikut, duke rrezikuar sezonin turistik. Alarmi është dhënë kohë më parë edhe nga Sektori i Higjienës që gjatë inspektimeve kanë konstatuar se njësitë vendore kanë dhënë leje ndërtimi për shumë subjekte pa një studim paraprak, të cilat nuk janë të lidhur me rrjetin e kanalizimeve, por përdorin gropat septike, shumica e të cilave është parë se janë nën kapacitet, të dëmtuara dhe aspak hermetike, duke shtuar ndjeshëm ndotjen e ujërave detare.