Durres, mungon energjia, bizneset te shqetesuara
Biznesmene te ndryshem deklarojne se mjedisi qe rrethon biznesin eshte i papershtatshem dhe pak inkurajues per investime. Kufizimet e energjise elektrike qe kane nisur kete jave kane dhene sinjalet e para negative, ndersa drejtuesit e tyre urojne qe te jene te perkohshme e te mos shtrihen pergjate te gjithe dimrit.
“Humbjet ditore variojne nga 200 ne 300 mije leke te vjetra, ndersa efekti mujor i ketyre nderprerjeve per biznesin tim parashikohet te arrije ne gjashte milione leke”, thote per "Shqip" administratori i nje biznesi ne Shkozet te Durresit.
E njejte eshte situata dhe per biznese te tjera te cilat flasin per ndikimet negative te ketyre kufizimeve. Sipas te tjere biznesmeneve ne qytet, te cilet aktivitetin e tyre e bazojne kryesisht ne prodhim, mjedisi qe rrethon biznesin vazhdon te jete i veshtire, kryesisht per shkak te nderprerjeve te shumta te energjise, te cilat shtrihen pergjate te gjitha stineve te vitit.
"Jo vetem kaq. Edhe infrastrukturat e dobeta, korrupsioni gjeresisht i perhapur, tregu i papershtatshem i tokes dhe pasurive te patundshme, kapacitetet administrative te kufizuara dhe siguria ligjore e pamjaftueshme per kompanite ndikojne negativisht per investimet dhe per funksionimin normal te ekonomise se tregut te lire", shton nje tjeter biznesmen.
Te te gjithe te kontaktuarit mbizoteron frika ne deklarimin e hapur te shqetesimeve te tyre, pikerisht per shkak te ketij terreni te veshtire.
Ne Durres, qe nga e hena e kesaj jave kane rinisur oret e gjata te nderprerjes se energjise elektrike. Te pakte jane ata qe besojne se kufizimet 5-9 oreshe po behen per remonte ne linja, siç eshte deklaruar zyrtarisht.
I njejti argument u dha edhe gjate veres, kur sezoni turistik u godit me terrin e prodhuar nga Korporata Elektroenergjetike. Vitin e kaluar, dhjetera subjekte mbyllen aktivitetin e tyre.
Pronare te subjekteve te tjera deklarojne se do te detyrohen te ndjekin te njejten rruge ne rast se kriza energjetike do te vazhdoje.
Kostot e saj jane teper te larta, jo vetem ne shpenzimet plus qe behen per te mbajtur aktivitetin me energjine e prodhuar nga djegia e karburanteve, po dhe ne shpenzimet konstante per pagat e punetoreve, lenden e pare dhe gjithçka tjeter qe perfshihet ne to.
Ajo se ciles i tremben me shume biznesmenet eshte pasiguria qe prodhon mungesa e energjise per zbatimin e kontratave te lidhura me klientet. Mosrespektimi i tyre mund t’i beje te humbasin klientelen dhe detyrimisht kjo i çon drejt falimentit.