Dy aksidente rrugore, katër të plagosur

Katër persona, mes tyre një efektiv policie në Korçë si dhe tre pjestare të së njëjtes familje, kanë mbetur të plagosur si pasojë e dy aksidenteve të ndryshme rrugore në Durrës e Sukth.

I.Cakerri, 30- vjeç, efektiv policie ka mbetur i plagosur rëndë për shkak të një aksidenti të ndodhur në autostraden Tiranë- Durrës, në afërsi të mbikalimit të Sukthit.

30- vjecari sipas policisë ka humbur drejtimin e automjetit tip Ford me targa AA  943 CA, me të cilin po udhëtonte duke dalë  nga rruga. Si pasojë e përplasjes së fortë, 30- vjeçari ka marrë dëmtime të shumta në kokë e në trup, ku ndodhet në gjendje kritike për jetën në sallën e reanimacionit në spitalin e Durrësit. Ende nuk dihen arsyet e aksidentit, por mendohet që të ketë ndikuar koha e keqe si dhe shpejtësia tej normave të lejuara.

Ndërkaq, më herët një tjetër aksident me pasojë plagosjen e tre kalimtareve, pjesë e së njëjtës familje është regjistruar në rrethrrotullimin e Kenetës. Të dëmtuarat e identifikuara janë V. Ndoj, 40- vjeçe, E. Ndoj 18-vjeçe si dhe P. Ndoj 19 -vjeçe, pjestarë të së njëjtës familje. Personat e plagosur janë dërguar menjëherë për në spital ku ndodhen nën kujdesin e mjekëve, jashtë rrezikut për jetën. Drejtuesi i mjetit që shkaktoi aksidentin është shpallur në kërkim nga policia.