E liroi gjykata, 17-vjeçarja vetëgjyqësi pas përdhunimit

 

LEZHE / ROLAND NIKOLLI

Një 17-vjeçare sfidon drejtësinë duke përdorur vetëgjyqësinë. Ajo tentoi dje të vrasë me armë zjarri një 18-vjeçar, të cilin e akuzoi se e kishte përdhunuar, por gjykata e liroi një muaj pas arrestimit për mungesë provash. Policia e Lezhës bëri të ditur se adoleshentja A.J. tentoi të hakmerret pas vendimit të padrejtë sipas saj që ka dhënë gjykata për lirimin e K.L. Ngjarja ndodhi rreth orës 18:40 në një lokal në fshatin Tale të Lezhës ku viktima punonte. Vajza ka udhëtuar nga fshati i saj Shënkoll, e armatosur dhe kur mbërriti në lokal qëlloi tre herë ndaj personit të cilin ajo e akuzoi se i kishte marrë nderin. Asnjëri prej plumbave nuk e kapën shënjestrën e saj, pasi ai arriti të largohet me shpejtësi nga dera e pasme e lokalit. Ngjarja terrorizoi klientët e shumtë, të cilët i shpëtuan mrekullisht plumbave të kallashnikovit. Mes britmave ata u shtrinë të gjithë përdhe për t’iu shpëtuar plumbave. Pas ngjarjes në vend mbërriti policia e Lezhës, e cila disa orë më pas shoqëroi në ambientet e saj autoren, si dhe sekuestroi armën e krimit. Mësohet se vajza ka pranuar autorësinë. Sipas dëshmisë së saj, ajo kishte vendosur ta vriste vetë djalin, i cili e kishte përdhunuar rreth dy muaj më parë. Pas denoncimit të saj, K.L u arrestua. Gjykata vendosi masën e sigurisë “arrest me afat 1 muaj”. Por pas hetimeve të kryera dhe raportit mjeko-ligjor rezultoi se ajo nuk ishte përdhunuar dhe gjykata e la atë të lirë. Adoleshentja nuk është pajtuar me këtë vendim, sipas saj, të manipuluar. “Shteti nuk më mbrojti, ndaj jam detyruar ta mbroj vetë nderin tim. Prej kohësh e kisha siguruar armën pa dijeninë e prindërve të mi”, është shprehur 17-vjeçarja para policisë, duke mos shfaqur pendesë për krimin e kryer. Policia ngriti një grup hetimi për këtë çështje ndërsa pritet që specialistët e Ministrisë së Drejtësisë të mbërrijnë në Lezhë dhe të kalojnë në sitën e tyre gjithë dokumentacionin dhe procedurat e ndjekura nga ana e gjyqësorit për lirimin e 18-vjeçarit.
Ngjarja për të cilën adoleshentja nga Shënkolli i Lezhës kreu denoncimin ka ndodhur dy muaj më parë. Sipas dëshmisë së saj, ajo ishte në dyqanin në pronësi të familjes, kur K.L është futur dhe pasi i ka mbyllur derën e ka përdhunuar. Policia e akuzoi për “vrasje të mbetur në tentativë dhe armëmbajtje pa leje” por burimet pohuan se mund të vendoset hetimi në gjendje të lirë për shkak të moshës.