Edi Rama, nga gjuha e rrugës tek bllokimi i rrugës

Rrugët nacionale nuk po bllokohen nga dëbora apo rënia e masive e dheut, as nga hordhia e dyndjeve barbare, por nga deputetë socialistë të kryqëzuar me militantë fanatikë, të cilët me sms-urdhër nga Tirana kanë paralizuar për disa minuta akset kryesore rrugore në mbarë vendin, duke shkaktuar tension e konfrontime me forcat e policisë. Protesta e opozitës socialiste për hapjen e kutive është zhvendosur nga Tirana në disa zona të vendit, nga jugu në veri, por grevat e urisë po zëvendësohen me një strategji të re, atë të bllokimit të arterieve kryesore kombëtare.
Gjithsesi është e papranueshme. Edi Rama po luan me zjarrin. Shteti nuk mbahet me tolerancë apo me marrëveshje frike. Shteti mbahet kur zbatohet ligji. Sigurisht bllokimi i rrugëve ka ardhur në shenjë të parë të “mosbindjes civile” dhe “ barrikadës njerëzore” si demonstrim force e mbështetjeje për grevën e urisë së deputetëve të PS dhe mbështetësve të tyre, që prej 11 ditësh në çadrat para kryeministrisë. Afërmendsh imazhi i Shqipërisë është i dhunuar katërcipërisht nga mistifikimi i kauzës dhe sensibilizimit të saj si me grevën e urisë, po ashtu edhe me pengimin e trafikut rrugor kombëtar, çka ka irrituar qytetarët qoftë të majtë, qoftë të djathtë.
Sidoqoftë të mundohesh të shkaktosh kaos dhe rrëmujë nëpër rrugët e vendit si dhe të luftosh për të penguar integrimin e vendit vetëm e vetëm për interesat e Edi Ramës, Gramoz Ruçit, S. Gjinushit, Arta Dade-Dabulla, dhe mullahut të tyre shpirtëror Ramiz Alia, i cili u pozicionua pro grevës së urisë.
Qëllimi i këtyre akteve guerrile është që të shfrytëzojnë me çdo mjet mundësinë që të pengojnë integrimin e Shqipërisë, dhe ta përdorin këtë si bonus për të ndersyer militantët socialistë kundër qeverisë “Berisha”, për të përfituar nga kaosi e vetiu për të përfituar pushtet. Greva e urisë (nëse mund ta quajmë kështu në ditën e 12-të) është uria e Edi Ramës për pushtet. Edi Rama ka psikozën physique du role të protagonistit ku suksesin e Shqipërisë e sheh si dështimin të tij, prandaj instinktivisht kërkon ta sekuestrojë shpresën e shqiptarëve përpara liberalizimit të vizave.
Radikalizimi i situatës me politikën e rrugës greviste, bojkotin full-time të institucionit bazë të demokracisë përfaqësuese, parlamentit, përmendjen e dhunës dhe forcës për të sugjestionuar kamikazë që mendojnë se politika e tyre ka nevojë për martirë.
Sidoqoftë kanë kaluar 8 muaj nga zgjedhjet parlamentare dhe mund të thuhet se Edi Rama, pavarësisht çmimit të lartë për vendin dhe demokracinë e brendshme, e fitoi betejën-farsë brenda partisë SOS-ialiste, duke arritur të narkotizojë çdo mendim ndryshe, që sot pi kafe gjithë ditën tek libri universitar.
Edi Rama kur nuk është në rrethinat e kryeministrisë e gjen duke fërkuar duart plot pluhur betonarmeje dhe me një buzëqeshje hiene, pret mortin dhe aleancën e krizave: të asaj ekonomike dhe kutiste, për të provuar se të gjithë fajin e kanë kutitë e mbyllura. Horoskopi edvinist parashikon paqshëm për të pritshmen politike të një aleancë të krizës së kutive dhe asaj ekonomike, por që s’ka gjasa të ndodhë, pasi janë gjëra krejt të kundërta.