Ekspertët e KE në Tiranë: Ja kushtet për lëvizjen e lirë

 

Etleva Delia

Ekspertët e Komisionit Evropian, të cilët do të qëndrojnë për një javë në Shqipëri, kanë detajuar kushtet që duhet të plotësohen në fushën policore për të përfituar liberalizimin e vizave. Gjatë gjithë javës përfaqësuesit e BE-së do të shqyrtojnë nga afër zbatimin nga ana e autoriteteve shqiptare të udhërrëfyesit për një regjim të liberalizuar vizash. Burime nga Drejtoria e Përgjithshme e Policisë, ku ekspertët evropianë zhvilluan dje takimin e parë në Departamentin e Kufirit dhe Migracionit thanë se ekspertët do të kontrollojnë të gjitha pikat e kalimit kufitar, për të parë kushtet dhe mënyrën e punës. Puna e tyre ka nisur dje në Drejtorinë e Policisë së Tiranës dhe në Aeroportin e Rinasit. Të njëjtat burime konfirmuan se ky mision do të pasohet nga dy të tjerë po në nivel teknik, raportet e të cilëve do t’i shërbejnë Komisionit Evropian për t’u shprehur në favor ose jo të qarkullimit të lirë të qytetarëve shqiptarë në Evropë.
KUSHTET
Pohimi i parë i ekspertëve të Komisionit Evropian, sapo kanë ardhur në Shqipëri ka qenë se heqja e regjimit të vizave duket një gjë mjaft e vështirë. Në muajin mars të vitit të kaluar, komisioneri Frattini nënshkroi në Tiranë hapjen e bisedimeve për liberalizimin e vizave. Në qershor Shqipërisë iu dorëzua udhërrëfyesi i procesit të liberalizimit, 42 kërkesa që duhet të plotësonin autoritetet shqiptare. Kushtet që kanë paraqitur ekspertët e Komisionit Evropian, kanë të bëjnë me realizimin e disa reformave, por më së shumti me përmbushjen e një numri çështjesh teknike, që nga dokumentet e identitetit dhe ato të udhëtimit e deri të kontrolli i kufijve, sistemet online, lidhjet në rrjet dhe mundësia e aksesit me rrjetet e Europolit e Interpolit, forcimi i kapaciteteve teknike e teknologjike, si dhe ngritja e strukturave të reja. Shqipëria deri tani ka dorëzuar disa raporte në Bruksel për nivelin e realizimit të detyrave. Kushtet që kanë paraqitur dje ekspertët e BE-së do të vihen në zbatim në formën e një reforme në Departamentin e Kufirit dhe Migracionit. Ndërkohë, gjatë kësaj jave që ata do të qëndrojnë në Shqipëri do të jetë në formën e inspektimeve, që ata do të bëjnë në të gjitha vendkalimet kufitare për të parë nga afër se si funksionon puna, si nga mënyra teknike, ashtu edhe kushtet teknologjike.