Elbasa, policia gjen dy femra të humbura

Dy nga pesë personat e shpallur të humbur nga policia e Elbasanit, janë kthyer në familjet të tyre dje në orët e para të mëngjesit. Policia e Elbasanit ka bërë të ditur se në bashkëpunim me komisariatet në shumë rrethe të vendit, është bërë i mundur kthimi i dy femrave që tentuan të braktisin bashkëshortët dhe familjet e tyre. Burime zyrtare konfirmojnë se dje rreth orës 04:30 është bërë i mundur rikthimi në familje i shtetases Sheqere Kurti, 25 vjeçe, nënë e dy fëmijëve, e cila katër ditë më parë ishte larguar në drejtim të paditur. Gruaja ishte denoncuar e humbur nga bashkëshorti dhe policia ka bërë të mundur kapjen e saj në Sarandë, në tentativë për të kaluar ilegalisht në Greqi. Ndërkohë është bërë e mundur edhe gjetja e 20-vjeçares Odeta Tabaku, e denoncuar e humbur nga vëllai i saj. Burimet zyrtare konfirmojnë se 20-vjeçarja është kthyer në familje pas tri ditësh, por nuk jepen hollësi se në ç‘vend është gjetur. Ende enigmë ka mbetur zhdukja e një tregtari 46-vjeçar, i cili është larguar në rrethana ende të paqarta para pesë ditësh. Policia është duke vazhduar punën për gjetjen edhe të dy personave të tjerë, të humbur para një jave.