Emenike, tri vjet burg për kurdisje

Përfaqësuesi nigerian Emmanuel Emenike pritet të dënohet me tri vjet burg për implikimin në një varg skandalesh të ndeshjeve të kurdisura në Turqi. Prokuroria e krimit në Stamboll e akuzon futbollistin aktual të Spartak Moscas, në atë kohë i Fenerbahçes, se kishte simuluar, në maj të vitit 2011, se kinse ishte lënduar për të mos luajtur ndaj Karabuksporit.

Menaxheri i sulmuesit nigerian ishte marrë vesh me zyrtarët e Fenerbahçes për ta organizuar këtë ‘lëndim’ të lojtarit.

Dosja e Emmanuel Emenike ka përfunduar në një proces të thellë të ndeshjeve të kurdisura, i cili e përfshiu futbollin turk, e i cili ishte mbyllur në muajin qershor, me burgosjen e presidentit të Fenerbahçes, Aziz Yildirim, prej gjashtë vjet e tre muajsh.

Në total, 93 persona kishin përfunduar në gjykatë dhe shumë të tjerë janë burgosur për skandalin e kurdisjes së ndeshjeve, prej tyre drejtues klubesh, trajnerë dhe futbollistë.