Enkelejd Alibeaj: Vendimi i Kolegjit, KQZ do vlerësojë votat e kontestuara dhe ato të “pavlefshme”

“Komisioni Qendror i Zgjedhjeve, do të vlerësojë fletët e hedhura në kutitë për qendrat e votimit të mbetura pa u vlerësuar për Tiranën. Sipas vendimit, vlerësimi do të bëhet si për fletët e kontestuara edhe për ato të pavlefshme, për të vlerësuar në se realisht janë të pavlefshme apo mund të jenë cilësuar si të tilla pasi janë gjendur në kutinë e gabuar. Më pas, KQZ do të bëjë edhe ndryshim në tabelën e rezultateve, në se ka. Ky është veprim aritmetikor dhe kontesti i vetëm që mund të bëhet është që në se shuma aritmetikore, nuk është bërë në rregull. Vetëm kështu mund të ankimohet çështja”- u shpreh Alibeaj. Sipas tij, KQZ aktualisht do të merret me vlerësimin e kutive në 368 Qendrat e Votimit, pasi për 117 qendra, ajo është shprehur pasi i ka vlerësuar ato. “Komisioni do të identifikojë dhe ato fletë që janë cilësuar të pavlefshme, por që janë hedhur nga KZAZ përkatëse sepse janë gjendur në kutinë e gabuar. Këto do të shqyrtohen dhe do të vlerësohen dhe në se janë të vlefshme do të përfshihen në rezultat”- vijoi Alibeaj.
Sipas tij, me një vendim të tillë, të marrë nga Kolegji Zgjedhor, pritet që të bëhet edhe rakordim më i mirë i shifrave, që kanë mospërputhje, për shkak të ngatërrimit të kutisë së votimit dhe pretendimet e ngritura nga opozita se bëhet fjalë për manipulime. “Në këtë mënyrë pra, Kolegji Zgjedhor, jep edhe mundësi që KQZ, të bëjë rakordimin e mospërputhjeve të shifrave.
Alibeaj u shpreh gjithashtu, se një procedurë e tillë në KQZ, miratohet me një shumicë të thjeshtë votash, pa pasur nevojën e një shumicë të cilësuar në institucionin zgjedhor, prej 5 votash. Kolegji Zgjedhor, zbardhi vetëm dy ditë më parë, brenda afateve ligjore, vendimin e marrë në lidhje me kërkesën e selisë rozë për fletët e votimit të hedhura në kutinë e gabuar. Ky organ gjyqësor, jo vetëm që e cilësoi si të drejtë vendimin e KQZ-së për këtë fenomen të ndodhur në 8 maj, por edhe kërkoi hapjen e kutive të tjera të mbetura për Tiranën në mënyrë që dhe në to të vlerësohet në se ka apo jo fletë të hedhura gabim.