Era e fortë bllokon tragetet në port

Moti i keq ka prekur sërish Vlorën. Era e fortë në orët e paradites ka shkaktuar probleme në portin detar të qytetit. Burime nga Kapitaneria e portit kanë konfirmuar se asnjë anije nuk është lejuar të dalë në det, si pasojë e erës së fortë dhe detit të trazuar, çka e bënte të pamundur lundrimin. Përveç anijeve të peshkimit dhe anijeve tregtare, edhe dy tragetet e linjës Vlorë-Brindisi kanë qëndruar në radë. Sipas Kapitanerisë, era e fortë dhe moti i keq do të vijojë deri paraditen e sotme, çka ka bërë që të jepet rekomandimi që anijet të cilat janë gjendur në det të sistemohen në vendstrehime, ndërsa të tjerat të mos nisen sipas planifikimit të bërë.