Europa përgatitet të ‘peshkojë’, mjaft lojtarë janë pa kontratë

Shumë prej lojtarëve që do të jenë pa kontratë në fund të sezonit, janë yje që kanë shkëlqyer me klubet e tyre. Në listë Mekses, Pirlo, Sedorf, Ouen apo edhe Van Nistelroi

Gjatë verës, shumë lojtarë të njohur botërorë do të jenë të lirë, pasi që do t’u skadojnë kontratat me klubet përkatëse. Me këtë rast, klubet e interesuara e kanë rastin që, qysh tani, të mendojnë për transferimin e tyre, i cili do të bëhej ‘gratis’ dhe do të paguanin vetëm rrogën e lojtarëve. Një pjesë e mirë e këtyre lojtarëve janë paksa në moshë të madhe, por jo të gjithë. Madje, edhe “të moshuarit” mund t’i japin ende futbollit. Ndërsa klubet e mëdha europiane po përgatisin miliona euro për kartonin e Gareth Bejl ose Çesk Fabregas, klubet e ‘mençura’ do të mund të përforcohen pa shpenzuar fare para. Njëri prej lojtarëve më të rëndësishëm, të cilit do t’i përfundojë kontrata gjatë verës është Filip Mekses. Mbrojtësi francez nuk e ka gjetur gjuhën e përbashkët me klubin nga kryeqyteti italian për vazhdimin e kontratës, kështu që ai mund të largohet. Sipas mediave italiane, Mekses mund t’i bashkohet Milanit.

Një tjetër lojtar me emër është edhe Miroslav Klose. Bajern Mynhihu ka hequr dorë nga ylli i përfaqësueses gjermane, kështu që futbollisti me prejardhje polake do ta kërkojë ‘strofullën’ e re gjetkë. Milani po mendon ta rinojë ekipin, prandaj e ardhmja e pesëshes Nesta-Pirlo-Sedorf-Ambrozini-Inzagi, të cilëve u skadon kontrata në qershor, nuk dihet ende. Edhe eksperienca e mbrojtësit Zhoze Bosingva te Çelsi duket se ka marrë fund. Palët nuk e kanë rinovuar kontratën, kështu që mbrojtësi i djathtë portugez i ka bërë gati valixhet për të lëvizur. Mançester Junajtid mund të mbetet pa dy Ouenët, Hargrivs e Majkëll, të cilët mund ta ndërrojnë mjedisin.

‘Djajtë e Kuq’ duhet të kërkojnë portier, sepse veterani holandez, Edvin Van Der Sar, jo që nuk do ta vazhdojë kontratën, por për të kjo do të jetë kontrata e fundit, pasi ai planifikon ta përfundojë karrierën në fund të këtij sezoni.

Edhe holandezi tjetër, Rud Van Nistelroi do të ndahet gjatë verës me Hamburgun, pasi t’i skadojë kontrata. Sulmuesi i shkathtë është mjaft i mërzitur me klubin gjerman, i cili nuk e la që të rikthehet te Real Madridi.

Disa lojtarë që do të jenë “free”

Ouen Hargrivs Mançester

Pipo Inzagi Milan

Sebastian Larson Birmingem

Majkëll Ouen Mançester

Simone Perrota Roma

Najxhëll Reo-Koker Aston Vila

Jon Dahl Tomason Fejenord

Piotr Troçovski Hamburg

Edvin Van Der Sar Mançester

Rud Van Nistelroi Hamburg

Robert Grin Uest Hem

Nunjo Gomesh Benfika

Marko Di Vaio Bolonja

Masimo Ambrozini Milan

Zhoze Bosingva Çelsi

Alesandro Nesta Milan

Andrea Pirlo Milan

Klarens Sedorf Milan

Miroslav Klose Bajern

Visente Rodrigez Valencia

Thomas Kraft Bajern

Reto Zigler Sampdoria

Johan Elmander Bolton

Hamit Altintop Bajern

Filipe Mekses Roma

Taje Taivo Marsejë