FBI : Sulmi në Fort Hood nuk ishte komplot

Burime të FBI-së thonë se ushtaraku i forcave të armatosura amerikane që dyshohet për vrasjen e 13 njerëzve në bazën ushtarake të Fort Hood, nuk ishte pjesë e një komploti më të gjerë terrorist dhe se nuk ishte përfshirë në veprimtari terroriste". Për Majorin Hasan Nidal FBI ka deklaruar se ai ishte vënë re nga FBI-ja në muajin dhjetor, si pjesë e një hetimi kundër terrorizmit, por nuk kishte ngritur shqetësime tek hetuesit. Organet hetimore thonë se komunikimet e tij me persona të tjerë ishin në të njëjtën linjë me punën e tij, duke qenë një mjek psikiatër në ushtrinë amerikane. Hasan aktualisht ndodhet ne spital, por ai ka dalë nga koma ku kishte hyrë pasi u qëllua nga policia gjatë sulmit të kryer javën e kaluar. Si pasojë e sulmit me armë të ndërmarë prej tij, 13 persona u vranë dhe 29 të tjerë mbetën të plagosur. Ngjarja u regjistrua të enjten e kaluar në bazën ushtarake të Teksasit.
FBI thote se nuk ka asnjë informacion që të tregojë se Hasan ishte pjesë e një komploti terrorist, por nuk bën të ditur emrin e personit me të cilin majori komunikoi para sulmit, që dyshohet të jetë një klerik radikal që jeton në Jemen. Hetuesit theksojnë se komunikimet e tij me një person tjetër kanë qenë në përputhje me punën e tij si një psikiatër i ushtrisë. Ekspertët thonë se ka patur 10 deri në 20 komunikime duke filluar që nga dhjetori i 2008 deri në vitin 2009. Sipas tyre përmbatja e tyre ishte e natyrës sociale, por edhe të një udhezimi fetar. Por ato nuk përfshijnë ndonjë lloj kërcënimi apo nxitje të gjuhës që do të kishte provokuar ndonjë hetim.