FMN: Europa po rimëkëmbet

Rimëkëmbja e ngadaltë e ekonomisë evropiane në përfundim të krizës ekonomike botërore do të jetë e ngadaltë, pasi rritja e sektorit financiar nuk mjafton për zvogëlimin e ndjeshëm të papunësisë. Kështu u shpreh ditën e hëne në Varshavë drejtori i përgjithshëm i Fondit Monetar Ndërkombëtar.
"Evropa i ka rezistuar më mirë krizës, sepse ekonomitë më pak delikate bien më ngadalë", deklaroi Dominique Strauss-Kahn gjatë një fjalimi të mbajtur përpara studentëve të Shkollës së Ekonomisë në Varshavë.
"Por, për shkak të kësaj mungese elasticiteti, rimëkëmbja do të kërkojë pak kohë për t'u arritur", shtoi Strauss-Kahn, në vizitën e tij të parë në Poloni si kreu i FMN-së.
"Dhe kjo rimëkëmbje e ngadaltë do të sjellë në Evropë një rritje reale prej rreth 1 %, ndoshta 1,5 %, ndoshta edhe pak më tepër, por jo shumë më tepër, gjë që nuk është aq sa duhet", vazhdoi Strauss-Kahn.
"Një rritje e dobët ekonomike në Evropë shoqërohet me papunësi të lartë. Dëgjoj shumë njerëz që thonë 'Krizën e lamë pas, ajo përfundoi'. Mendoj se ata e kanë gabim".
"Krizën financiare ndoshta e kemi lënë pas, por pasojat e saj në shoqëri do të ndihen për një kohë të gjatë. Dhe për sa kohë nuk është zvogëluar papunësia, nuk mund të themi se ka kaluar kriza", shtoi ai.