FOKUS – Komisioneri i BE-së paralajmëron për ndërprerje të udhëtimeve ajrore në të ardhmen

ATHINË, 27 prill /ATSH-DPA/- Komisioneri i Bashkimit Evropian për Transportin, Apostolos Tzitzikostas ka paralajmëruar për ndërprerje të konsiderueshme të udhëtimeve ajrore, si rezultat i luftës në Iran dhe mbylljes së Ngushticës së Hormuzit.

“Situata nuk është e mirë”, tha ai për kanalin grek të lajmeve “Skai”.

“Aktualisht, karburanti i nevojshëm është i disponueshëm dhe më shumë se 80% e aeroporteve nuk kanë raportuar mungesa”, tha ai.

Megjithatë, çmimet janë dyfishuar, gjë që ka çuar në pezullimin e shumë fluturimeve të linjave ajrore, që nuk ishin të qëndrueshme ekonomikisht edhe para luftës.

Ai shtoi se nëse bllokada vazhdon dhe nuk gjendet një zgjidhje, mungesat e karburantit mund të lindin pas qershorit.

“Një mungesë e vërtetë në Evropë nuk pritet për momentin”, theksoi Tzitzikostas, duke iu referuar rezervave ekzistuese të emergjencës.

Shteteve anëtare të BE-së u është kërkuar të raportojnë rezervat e tyre çdo ditë – në mënyrë që të mbajnë një pasqyrë të përgjithshme të rezervave të disponueshme.

“Nëse shfaqen mungesa pas qershorit, këto rezerva mund të lirohen në një mënyrë të synuar”, shtoi ai. //a.i/