Falsifikimi i patentave, “Targat Ekspres” çojnë 11 persona në prangat e policisë
Korrupsioni me patentat ka çuar dje në prangat e policisë 11 persona, 4 prej të cilëve zyrtarë të Drejtorisë së Shërbimeve të Transportit Rrugor. Në prangat e policisë ka përfunduar edhe një oficer i policisë, si dhe 6 persona të tjerë. Operacioni për prangosjen e të dyshuarve, i koduar me emrin “Targat Ekspres”, është kryer nga policia e kryeqytetit, në bashkëpunim me Task Forcën në prokurorinë e Tiranës. Këta të fundit kishin rënë prej disa kohësh në gjurmët e të dyshuarve, të cilët akuzohen se kanë pajisur me patenta persona që nuk plotësonin kriteret.
Arrestimet
Disa muaj hetime nga ana e Krimit Ekonomik të Policisë së Tiranës, kryer në bashkëpunim me Task Forcën në prokurorinë e kryeqytetit, janë finalizuar ditën e djeshme me arrestimin e 11 personave. Arrestimi i të dyshuarve është kryer gjatë operacionit të koduar me emrin “Targat Ekspres”. Këta të fundit akuzohen se në bashkëpunim me njëri-tjetrin kanë abuzuar gjatë pajisjes ma patenta të personave të ndryshëm, të cilët nuk plotësonin kriteret e duhura. Të prangosurit e këtij operacioni janë Ylli Hasani, 41 vjeç, me detyrë komisioner për dhënien e lejeve të drejtimit të mjeteve pranë DRSHTRR, Vladimir Dervishi, 58 vjeç, me detyrë instruktor dhe bashkëpronar i autoshkollës “Majestik”. Gjithashtu, gjatë operacionit u arrestua edhe Silvana Memia, 42 vjeçe, me detyrë arshiviste pranë DRSHTRR, Tiranë, Besjana Belli, 27 vjeçe, me detyrë sekretare e sektorit të regjistrimit të mjeteve në DRSHTRR, si dhe Feride Kateshi, 38 vjeçe, punonjëse e agjencisë së sigurimeve “Atlantik” pranë DRSHTRR, Tiranë. Tre të prangosurit e këtij operacioni janë Daniel Cami, 38 vjeç, me detyrë pranues dokumentesh në qendrën e kontrollit teknik të mjeteve pranë DRSHTRR, Tiranë, Adrian Rushiti, 35 vjeç, i cili siguronte dokumente të falsifikuara personave të mësipërm kundrejt ryshfeteve, si dhe Pëllumb Mancila, 46 vjeç, punonjës policie, me detyrë oficer i Patrullës së Përgjithshme në Komisariatin 4, Tiranë. Sipas burimeve të policisë, pas hetimeve disamujore u vërtetua se këta shtetas abuzonin me detyrën dhe pajisnin me patenta persona që nuk plotësonin kriteret. Lëshimi i patentave mësohet se bëhej kundrejt një shume të madhe parash. Sakaq, gjatë momentit të arrestimit, policia ka kontrolluar Zyrat e Drejtorisë së Shërbimit dhe Transportit Rrugor, si dhe banesat e personave të prangosur. Mësohet se gjatë kontrollit të tyre, uniformat blu të policisë kanë sekuestruar një sërë dokumentesh, të cilat vërtetojnë akuzat ndaj të pandehurve.