Feith angazhohet për një RTK të pavarur

Përfaqësuesi Special i Bashkimit Evropian në Kosovë, Pieter Feith, tha sot se misioni që ai drejton është i interesuar që Kosova ta ketë një transmetues publik i cili do të jetë tërësisht i pavarur.

Feith, pas një takimi me kryetarin e Bordit të RTK-së, Rrahman Paçarizi, ka thënë se situata e financiare e RTK-së është shumë serioze dhe shprehu përkrahjen e tij për gjetjen e një zgjidhjeje. “Ne jemi shumë të interesuar që ta kemi një transmetues publik, që është plotësisht i pavarur”.

Sikur raporton vetë RTK-ja, Feith ka deklaruar se Radio Televizioni i Kosovës duhet të ketë një financim të pavarur, ndërkohë që ka theksuar se drejtori i ardhshëm duhet të jetë një profesionist, menaxher i mirë dhe i pavarur politikisht.

Kurse Paçarizi ka thënë se RTK-ja gjendet në gjendje të vështirë financiare dhe kërkoi që të gjendet një zgjidhje emergjente.

“Çështjet që u diskutuan, kanë të bëjnë me çështjet më emergjente që e karakterizojnë RTK-në. Çështja ma kryesorë është ajo lidhur më financimin. Ne sot kemi kërkuar mbështetjen dhe kemi marrë mbështetjen e z. Feith, së pari për një financim të përkohshëm, për të dalë nga situata e kolapsit financiar, në të cilën RTK ndodhet, e më pas edhe në gjetjen e një zgjidhjeje të qëndrueshme. U pajtuam që duhet të ketë një financim të pavarur, i cili duhet të sigurojë edhe politika të pavarura editoriale”, tha ai.

Feith dhe Paçarizi janë pajtuar që së shpejti të hapet një kanal televiziv në gjuhën serbe.