Fest 2009, lojërat popullore startojnë në Shkodër

Në qytetin Shkodrës ka nisur një prej evenimenteve më të rëndësishme kulturore kushtuar të rinjve, Festivali i Lojërave Popullore Mbarëshqiptare Fest 2009. Në këtë aktivitet qindra të rinj nga qarku i Shkodrës, Kosova dhe Mali i Zi u mblodhën dje në Pallatin e Sportit të qytetit verior, vend në të cilin po zhvillohet ky festival. Ky aktivitet organizohet nga shoqata  "The Door", e cila në këtë nismë kulturore mbështetet dhe nga Këshilli i Qarkut Shkodër, bashkia si dhe institucione të tjera kulturore. Përfaqësuesi i shoqatës "The Door" ,Kastriot Faci, tregon se ky aktivitet prezanton pasurinë e vlerave tona folklorike e kombëtare me këngë, valle etj, që ka zona veriore dhe në veçanti qarku i Shkodrës. Në këtë edicion të dytë marrin pjesë të rinj dhe reja nga shkollat shqiptare në Malin e Zi, kryesisht ato të Ulqinit dhe të Tuzit, si dhe të disa shkollave të Kosovës. Nisjen e festivalit e përshëndetën autoritetet më të larta drejtuese të qeverisjes vendore si Prefekti Maxhid Cungu, Kryetari i Këshillit të Qarkut, Gjovalin Kolombi dhe Kryetari i bashkisë së Shkodrës, Lorenc Luka. Më pas grupet konkurruese në këtë festival zhvilluan disa lojëra si "Thyerje Krahu" për femra dhe meshkuj, "Tërheqje litari", "Sfilatë- kostumi më i bukur popullor" prezantuar me nga një çift djalë dhe vajzë për çdo shkollë, "Lojë popullore", "Valle me motive folklorike", "Këngë me motive folklorike", si dhe shumë veprimtari të tjera kulturore.