Fiorentina, nis projekti me Behramin në krye

Valon Behrami konsiderohet pjesë e rëndësishme e projektit të ri të Fiorentinës. Skuadra nga Firenze, pasi ta sigurojë mbijetesën në Serie A, nga sezoni i ardhshëm do ta nisë projektin e ri, duke bërë ndryshme rrënjësore. Dhe flakadanin Viola pritet ta mbajë pikërisht futbollisti kosovar.

“Fiorentina do ta nisë një projekt të ri me Valonin në krye, edhe pse Juventusi mbetet në shënjestër, duke e pasur parasysh se trajneri Conte e vlerëson shumë futbollistin”, ka konfirmuar menaxheri i 26 vjeçarit, Alessandro Beltrami, për ueb faqen tuttomercatoweb.com.

Ndërkohë, menaxheri italian ka njoftuar se ish futbollisti i Veronës, i Lazios dhe i West Hamit pëlqehet edhe në Rusi. “Zeniti i Spallettit ka bërë ofertë mjaft të rëndësishme për Behramin, por djaloshi do të mbetet në Firenze, qytet me të cilin është mjaft i lidhur”, përfundoi Beltrami.

Behrami ishte transferuar në Fiorentinë në janar të vitit të kaluar. Ai u bë lojtar i rëndësishëm i ekipit nga Artemio Franchi dhe mund të vazhdojë të luajë edhe për disa vite me klubin e familjes Della Valle.