Fiton Partizani, Superiorja më afër

Partizani mori tri pikë të arta në fitoren 1-0 kundër Elbasanit në “Selman Stërmasi”, në ndeshjen përmbyllëse të javës së 25-të të Kategorisë së Parë. Në një stadium entuziast, me një numër të konsiderueshëm tifozësh nga të dyja kampet, Rrahman Hallaçi harkoi në zonën e Elbasanit, Renato Yshmeri gaboi, duke ia dhuruar topin Erjon Rizvanollit dhe sulmuesi i Partizanit, goditi pa u menduar dy herë, duke shënuar në minutën e 41-të në portën e mbrojtur nga Mançevski. Partizani jo vetëm që regjistroi ndeshjen e 15-të pa humbje, por lojtarët e tij tashmë do të arkëtojnë edhe nga 2 milionë lekë, si pjesë e paketës së serisë me katër fitore rresht, e ku përfshiheshin ndeshjet me Bilishtin, Pogradecin, Turbinën dhe Elbasanin. Partizani, pas një faze të parë të dyshimtë, e ku u larguan dy trajnerë, Eduard Zhupa dhe Skerdi Bejzade, është më pranë se kurrë rikthimit në Kategorinë Superiore, aty ku të kuqtë kanë fituar 15 tituj kampionë.