Flamuri sqaron rritjen ekonomike dhe ndryshimin e shifrave

Antena brenda familjes

Gazetari që merret me Antenën ngeli i shushatur nga kakofonia e shifrave të rritjes ekonomike dhe s’dinte kë të besonte si me afër së vërtetës.

Dyshifrorja e kryeministrit iu duk një palaçollëk dhe e hodhi tutje. 9,9 përqindëshi iu duk si ato çmimet e veshjeve sezonale që shënojnë 999 dhe jo 1000 në çmim, edhe pse dihet se s’ka lekë për kusur aq të vogël, Ridvani thoshte 7%, FMN 6%.

- Eh, bela e madhe në këtë Shqipërinë tonë, s’e gjen dot kollaj të vërtetën, - tha.

Vendosi që për t’u iluminuar sadopak t’i drejtohet si gjithnjë mikut të Antenës, Flamur Nokës ose Feimit, siç i thërrasin së fundi, për shkak se e ka ndryshuar emrin, kur ka ra poshtë nga fshati.

- E di ç’ke ti, - i tha Flamuri. - Me makinë je, hidhu këtej nga lagjja ime, se unë s’kam dalë në punë, se jam pak me grip, jam ftohur në Maçedoni, kur bëra Vitin e Ri.

Zbritën poshtë në klubin afër shtëpisë dhe gazetari e pyeti si ishte kjo puna e shifrës së rritjes ekonomike.

- Mixhë, mos e vra mendjen aq shumë. Po kush e merr vesh të vërtetën se sa jemi rritur. E rëndësishme është që jemi rritur dhe Shqipëria po ndryshon …

- Mirë, mirë, e di që po ndryshon, po shifra e vërtetë më duhet…

- Po ku ka shifër të vërtetë?! Ajo që thotë ai burri duhet marrë si e vërtetë…

Gazetarit s’po ia rrokte kandari këtë logjikën e Flamurit.

- Ja ta them unë se si e nxori shifrën ai burri, që të bindesh.

Më thirri mua në zyrë dhe më tha: “Flamur, si thua ti, sa ta shpallim rritjen ekonomike?”

- E bëjmë 50 %, i thashë.

- Jo, është shumë dhe na thonë gënjeni.

- E bëjmë 25 %, i thashë.

- Prapë shumë është.

- Epo, pa bisht fare s’do ta lëmë, se ne po rritemi vërtet.

- Dëgjo këtu, ke një makinë llogaritëse?

- Jo, i thashë, po i bëjmë me celular, se ka kalkulatriçe.

Seç bëri ca shumëzime e ca pjesëtime me celularin tim dhe në fund më tha: “Ta caktojmë 9,9 %, është dyshifrore”.

- Po dyshifrore është mbi 10?

- Pse, dy nëntat s’të pëlqejnë ty? Merre këtë dhe shpërndaje, jepja dhe Institutit të Statistikave të deklarojë sikur e ka bërë ai vetë llogaritjen.

- Po jemi që jemi, s’humbasim gjë sikur ta deklaronim 15 %?

- Jo, jo, duhet me presje dhjetore, se duket sikur i kemi llogaritë një më një dhe duket më e besueshme.

- Ja o mixhë, kjo qe shifra që doli dje në TV.

Gazetari vazhdonte ta shikonte i hutuar. Ndërkohë, te xhami i dritares së kafenesë kishin ngjitur hundën ca fëmijë dhe Flamuri u ngrit t’i ndiqte.

- Kalamaj të shpëjft. Janë cullët e një kushërinit tem që ka marrë shtëpi këtu afër, që ma dine akoma emrin Feim. Vetëm në i zënça… S’kanë faj, ma kanë bërë emrin si rritja ekonomike, herë me katër gërma, herë me 6 gërma.

Kalamajt u shfaqën prapë te xhami duke thërritur në kor: “O Feim, o Feim/ Puna jote aferim.”

Flamuri u ngrit prapë t’i përzinte dhe gazetari mori rrugën e kthimit po aq i trullosur sa erdhi.

Nga pas dëgjohej jehona e korit të fëmijëve:

O Feim, o Feim

Puna jote aferim.

Gomar ti, gomar kush t’vuni

Sot a nesër valon druni.