Forumi Ekonomik, Topi vizitë në Bosnjë

Presidenti i Republikës, Bamir Topi, u nis dje për në Sarajevë (Bosnjë-Hercegovinë), për të marrë pjesë në Forumin VI Ekonomik Rajonal për Europën Juglindore, që do të mbahet në datat 19-20 nëntor 2009. Në këtë veprimtari, kryetari i shtetit shoqërohet nga një delegacion zyrtar i përbërë edhe nga ekspertë të ekonomisë. Të pranishëm në Forumin VI Ekonomik Rajonal për Europën Juglindore, që organizohet nga kryetari i Presidencës së Bosnjë-Hercegovinës, Zheljko Komshiç, do të jenë edhe Presidenti i Republikës së Bullgarisë, Georgi Parvanov, Presidenti i Republikës së Kroacisë, Stjepan Mesiç, Presidenti i Republikës së Malit të Zi, Filip Vujanoviç, Presidenti i Republikës së Rumanisë, Trajan Basesku, Presidenti i Republikës së Sllovenisë, Danilo Tyrk dhe Presidenti i Republikës së Serbisë, Boris Tadiç. Diskutimet e pjesëmarrësve në këtë forum do të përqendrohen tek aftësitë ekonomike konkurruese të vendeve të rajonit. Në përfundim të tyre, Presidentët do të mbajnë një konferencë të përbashkët për shtyp.