Fushaj: Vëzhguesit e UEFA-s nuk konstatuan probleme

Pas vendimit që ka marrë UEFA për hetim të ekipit të Vllaznisë, për fiksim të rezultateve në ndeshjet e turit të dytë eliminator të Europa League kundër Rapidit të Vjenës, ka reaguar presidenti Valter Fushaj. "Jemi krejtësisht të pastër, ndaj dhe jemi të qetë e të hapur ndaj UEFA-s. Ata janë të lirë të bëjnë çdo hetim, por ne jemi të sigurt se gjithçka është e pastër. Jemi të gatshëm të ballafaqohemi me UEFA-n dhe ata e kanë rrugën e hapur të bëjnë çdo hetim", tha Fushaj. Ai shton se i gjithë ekipi dhe drejtuesit e tij janë krejtësisht të qetë dhe se lajmi për nisjen e hetimeve nuk ka pasur efekt demoralizues. Presidenti Fushaj ka theksuar se është e habitshme se si janë ngritur dyshimet për rezultate të fiksuara, kur relacioni i vëzhguesve dhe të deleguarve të UEFA-s për ndeshjet ka qenë krejtësisht i rregullt. "Nuk na mbetet veçse të presim atë çfarë do të dalë nga hetimet, por kjo nuk na pengon në rrugën drejt objektivave tanë", përfundoi ai.

A. Hoti