Futboll: Vazhdon “telenovela” Kosova - Brazili

Fatmir Bytyci, Prishtinë - Mundësitë për zhvillimin e ndeshjes së futbollit të shumëpërfolur këtyre ditëve në mes përfaqësueses së Kosovës dhe Brazilit po zbehen gjithnjë e më shumë. Derisa Brazili dhe Zvicra tashmë kanë konfirmuar zhvillimin e këtij takimi, në anën tjetër FIFA ende nuk e ka dhënë përgjigjen e vet nëse mund të zhvillohet ndeshja Kosova - Brazili. Kështu që, kontaktet e drejtuesve të Federatës së Futbollit të Kosovës (FFK), me zyrtarët e FIFA-së, kanë vazhduar edhe ditën e enjte.
I pari i FFK-së, Fadil Vokrri, në mëngjesin e ditës së enjte ka kontaktuar me këshilltarin e kryetarit të FIFA-së, Sep Blaterin.
"Ne edhe sot kemi vënë kontakte me këshilltarin e kryetarit të FIFA-së, Sep Blaterin, mirëpo ende nuk e kemi marrë përgjigjen zyrtare nga FIFA. Këshilltari i Blaterit na ka premtuar se gjatë ditës do ta marrim përgjigjen e FIFA-së, mirëpo në këtë drejtim ende nuk ka lëvizur asgjë zyrtare", ka thënë Vokrri.
Ka tri ditë që në mediet jo vetëm të Kosovës, por edhe në mediet e huaja, vecmas ato të Beogradit, më të madhe flitet për mundësinë e zhvillimit të ndeshjes në mes Kosovës dhe Brazilit. Madje, dy ditët e fundit ky lajm ka tronditur Beogradin, të cilët me gjithë arsenalin e tyre po bëjnë gjithcka që ta parandalojnë zhvillimin e këtij takimi, e që për shqiptarët do të realizohej ëndrra për t'i prekur yjet e futbollit brazilian. Ndonëse kanë kaluar dy ditë që FFK-ja është në pritje të përgjigjes nga FIFA, megjithatë drejtuesit e FFK-së shpresojnë në përgjigje pozitive.
"Ne jemi duke pritur përgjigjen nga ana e FIFA-së. Shpresojmë që nga FIFA do të marrim sinjal pozitiv", ka thënë Vokrri. Ndeshja në mes Kosovës dhe Brazilit është paraparë që të zhvillohet më 26 korrik në Gjenevë.