Futbollisti indian vdes nga sulmi në zemër

Një futbollist indian ka vdekur pas rrëzimit në fushë gjatë një ndeshjeje në ligën lokale në qytetin jugor të Bangalores.

D.Venkatesh, 27 vjeç, mesfushor i skuadrës Bangalore Mars, u inkuadrua në lojë si zëvendësues në minutën e 73-të dhe u rrëzua në tokë në fund të takimit, njoftuan mediet indiane.

Ato treguan se vetura e ambulancës nuk ishte në dispozicion dhe Venkatesh ishte dërguar në spitalin Hosmat me një kamionetë. Njoftimet e para sugjerojnë se sulmi në zemër ishte shkaktar i vdekjes.

E përditshmja Times of India citoi doktorin Ajith Benedick Royan nga spitali Hosmat duke thënë se nuk kishte lëndime të tjera të jashtme që mund të kenë ndikuar në vdekjen e Venkateshit.

Kjo ndodhi vetëm disa ditë pasi mesfushori i Boltonit, Fabrice Muamba u rrëzua në fushë gjatë ndeshjes kundër Tottenhamit në FA Cup, pasi kishte pësuar sulm në zemër. Ai është dërguar në spitalin London Chest dhe mbetet nën kujdes intensiv.

Më shumë nga Sporti