Gana mbyll ambasadën në Beograd, shkak Kosova

Mediat në Gana thonë se ky vend së shpejti do të mbyllë misionin në Beograd, pasi ky i fundit ka dëbuar ambasadorin e Ganës për shkak të njohjes së Kosovës.

Shefi i diplomacisë së Ganës, Alhaji Mohamed Mumuni, i ka thënë parlamentit se marrëdhëniet e përzemërta deri më tash ndërmjet dy vendeve, kanë pësuar dëme serioze pas njohjes së shtetësisë së Kosovës.

Portali GanaWeb shkruan se autoritetet e zemëruara serbe kanë bërë përpjekje që përmes ambasadorit në Beograd, Samuel Valis-Akjan, të bëjnë presion tek Akra zyrtare për të tërhequr njohjen.

Ministri Mumuni ka thënë se Ganës nuk i ka mbetur gjë tjetër pos të urdhërojë mbylljen e misionit të saj diplomatik në Beograd.

Ambasada e Ganës në Beograd ka konfirmuar për mediat serbe se ambasadori i saj ka udhëtuar drejt Ganës, por jo edhe informacionet për mbylljen e përfaqësisë diplomatike. Gana ka njohur pavarësinë e Kosovës në janar të këtij viti.