Gashi: Poetët shprehin atë që fle thellë në vetëdijen e tyre

Të enjten në Bibliotekën Kombëtare dhe Universitare në Prishtinë janë promovuar librat me poezi “Autoportreti pa kokë” dhe “Bota nis nga unë” të autorit Halil Gashi.

Shkrimtari Gashi, me rastin e promovimit të poezive të tij, ka bërë të ditur se në të dyja përmbledhjet shpalosen pjesë nga e kaluara e vendit tonë.

Ai, po ashtu, tha se të flasësh për veten është shumë vështirë, pasi që autorët përherë mundohen ta thonë atë që flenë thellë në vetëdijen e tyre.

“Të flasësh për veten është shumë vështirë për atë edhe poetët mundohen të shprehin dhe përjetojnë atë që e sublimojnë shumë thellë ta thonë përmes vargjeve të tyre që nga njëherë vjen vetiu e nganjëherë të shtynë diçka e dhunshme nganjëherë diçka dashur, por përherë mundohet ta thotë atë që flenë thellë diku në vetëdijen e tij”, tha Gashi.

Ndërsa Argjend Hasani, botues i librave, tha se autori Gashi lexuesve u ka ofruar vargje të këndshme.

“Në të dy librat e tij autori vërehej qartë që kishte ndrydhur emocionet, por befas në etapat e caktuara e kishin tradhtuar ato dhe kishte shpërthyer në përmasa të jashtëzakonshme si në kontekstin kohor, po ashtu edhe në kontekstin hapësinor, kështu që duke i vënë ato në letër dhe në kuadrin e një këndvështrimi dhe një botëkuptimi real autori në librin e dytë “Bota nuk nis nga unë” lexuesve u ka ofruar ca vargje të këndshme dhe autentike”, tha Hasani.