Gatishmëri për të gjitha rastet e virozës

Dje, në orën 16:00, ministrja e Shëndetësisë, Anila Godo, ka shkuar për inspektim në Urgjencën e Tiranës. Kreu i shëndetësisë ka deklaruar se të gjitha rastet e virozës nuk duhet të anashkalohen, por duhet të merren me seriozitet. Ndërkohë që për sa u takon masave dhe shqyrtimit të çështjes së gripit të derrave, influencës/AH1N1, kjo është në vëmendjen kryesore të shëndetësisë shqiptare. Sipas ministres, janë shqyrtuar plot 80 raste kampionësh. Deri tani nuk ka rezultuar asnjë rast i prekur nga gripi i derrave në Shqipëri. Ndërkohë që pritet edhe konfirmimi i 10 rasteve të tjera, mes të cilave janë edhe dy fëmijë nga qyteti i Vlorës. Instituti i Shëndetit Publik, përveç rasteve që ekzaminon në laboratorët e tij, mund të dërgojnë kampionë për analiza specifike edhe në qendrat e ekzaminimin në Rumani.

Kjo realizohet në bashkëpunim me laboratorët e Bukureshtit.

Mjekët e urgjencës kanë biseduar dje me ministren, duke dhënë edhe ata bilancet e të shtruarve të prekur nga viroza e stinës apo probleme lidhur me masat, me direktivat dhe vigjilencën nga ana e tyre. Sakaq, ministrja Godo ka theksuar edhe një herë se çështja e vaksinave është në shqyrtim e sipër. Shteti shqiptar ka një stok vaksinash Tamiflu, ndërsa ka bërë një kërkesë tjetër për doza të tjera, të cilat deri në muajin tetor do të jenë në "magazinat" shqiptare.