Gërdec, ushtria pastron 10 ha tokë

Gjatë operacionit, deri më tani janë kontrolluar dhe pastruar sipërfaqje me 10 ha tokë, ndërsa janë plasur dhe sistemuar 100 predha. Të dhënat e fundit vijnë nga Komisioni Ndërministror i Emergjencës Civile, duke iu referuar informacioneve të Komandës së Forcës së Bashkuar të Ministrisë së Mbrojtjes. Gjatë ditës së djeshme ka vazhduar intensivisht plani i operacionit për likuidimin e pasojave të shkaktuara nga shpërthimi i municioneve në depot e Gërdecit. Për të bërë të mundur pastrimin e zonës dhe gjetjen e ndonjë trupi të pajetë, kanë marrë pjesë forca ushtarake nga Brigada e Reagimit të Shpejtë, Brigada e Mbrojtjes Rajonale, Regjimenti Komando, Regjimenti i Helikopterëve, Grupet Speciale të EOD dhe AME, Policia Ushtarake, Batalioni Xhenier-Ndërtues. Në numër kemi, forca të sigurisë 138 persona, forca të kërkim-shpëtimit 250 persona, forca mbështetëse 150 persona dhe forca të tjera 142 persona. Të gjitha këto forca janë mbështetur nga 54 mjete transporti, 10 ambulanca, 2 fadroma, 2 hapëse pistash me zinxhirë, si dhe 2 qendra komandim drejtimi të lëvizshme.