“Gërdeci”, Prokuroria dërgon dosjen në Gjykatën e Lartë
Laureta Rryçi
Tiranë - Prokuroria dërgoi dje në Gjykatën e Lartë dosjen për tragjedinë e Gërdecit. Burime pranë kësaj gjykate pohuan dje për gazetën “Albania” se institucioni i akuzës ka dorëzuar pas mesditës dosjen me 80 fashikuj për të pandehurit e Gërdecit. Përfaqësuesit e akuzës duket se kanë hedhur përfundimisht versionin e fundit mbi ngjarjen pas një viti hetimi. Kështu, për 28 të pandehurit, mes të cilëve një ish-ministër dhe katër të arrestuar, do të njihen zyrtarisht me akuzat në sallën e gjyqit. Dosja e djeshme shënoi dosjen e dytë që po gjykohet në themel në Gjykatën e Lartë. Në të njëjtën kohë vendoset në bankën e të pandehurve ministri i dytë i kabinetit “Berisha”.
Dosja
Dy ditë më parë ishte vetë kryeprokurorja Ina Rama që la të kuptohej qartë se Prokuroria do ta dorëzonte dosjen shumë shpejt. Kështu, organi i akuzës nuk rrezikoi më me afatet hetimore, sikurse ndodhi me çështjen “Rrëshen-Kalimash”, me të pandehur ish-ministrin e Transporteve, Lulzim Bashën. Përveç katër të arrestuarve; Mihal Delijorgji, Ylli Pinari, Dritan Minxholli dhe Sokol Gjeçi, pjesa tjetër e të akuzuarve janë në gjendje të lirë. Mes tyre edhe ish-ministri i Mbrojtjes, Fatmir Mediu, i akuzuar për shpërdorim detyre në bashkëpunim së bashku me dy ish-sekretarët e Përgjithshëm të kësaj ministrie. Po për shpërdorimin e detyrës janë të pandehur edhe ish-ushtarakët më të lartë të Forcave të Armatosura, ish-shefi i Shtabit të Përgjithshëm Luan Hoxha, ish- zëvendës shefi i Shtabit të Përgjithshëm Agim Lala, ish-komandanti i Forcës së Bashkuar Shpëtim Spahiu dhe Zija Bahja, ish-komandant i Forcës Mbështetëse.
Hetimi
Sipas kërkesës për gjykim të 28 të pandehurit e kësaj dosjeje, në role dhe kohë të ndryshme, në bashkëpunim me njëri-tjetrin, kanë kryer një sërë veprash penale, që nga "shpërdorimi i detyrës"; "shkatërrim të pronës"; "falsifikim të dokumenteve" dhe "vrasje me dashje më shumë se njëherë kundër dy ose më shumë personave".
"Nga hetimet e dosjes ka rezultuar se të pandehurit e kësaj dosjeje, në bashkëpunim me njëri-tjetrin, por në role dhe kohë të ndryshme, me veprimet dhe mosveprimet e tyre me dashje, kanë hartuar shkresa të paligjshme në respektim të zbatimit të urdhrave të kundërligjshme të firmosura nga ish-ministri i Mbrojtjes, Fatmir Mediu, veprime këto që kanë faktuar një lidhje shkakësore me pasojat e ardhura nga ngjarja e ndodhur në Gërdec", - shkruhet në kërkesën për gjykim, që tashmë ka mbërritur në Gjykatën e Lartë. Gjatë hetimit ka rezultuar se në punishten e çmontimit të municioneve në Gërdec, organizimi i punës bëhej duke u përqendruar në një numër të madh punëtorësh, në një sipërfaqe shumë të vogël pune, çka ka cenuar kushtet e sigurisë teknike dhe kontrollin mbi procesin e çmontimit.
Dosja “Gërdeci”
Të pandehurit dhe akuzat
1. Fatmir Mediu, ish-ministër i Mbrojtjes, "shpërdorim detyre" dhe "favorizim në tender"
2. Luan Hoxha, ish-shef i Shtabit të Përgjithshëm të Forcave të Armatosura, "shpërdorim detyre"
3. Agim Lala, ish-zvshef i Shtabit të Përgjithshëm të Forcave të Armatosura, "shpërdorim detyre"
4. Shpëtim Spahiu, ish-komandant i Forcës së Bashkuar, "shpërdorim detyre"
5. Zija Bahja, ish-komandant i Komandës Mbështetëse, "shpërdorim detyre"
6. Ramadan Tartari, ish-drejtor në Ministrinë e Mbrojtjes, “shpërdorim detyre"
7. Ndue Marku, ish-drejtor i Harmonizimit të Legjislacionit, "shpërdorim detyre"
8. Ardian Mullahi, ish-sekretar i Përgjithshëm i Ministrisë, "shpërdorim detyre"
9. Adriatik Mema, ish-sekretar i Përgjithshëm i Ministrisë së Mbrojtjes, "shpërdorim detyre"
10. Shkëlzen Madani, ish-drejtor i Drejtorisë së Menaxhimit, "shpërdorim detyre"
11. Dashnor Çaushaj, kryetar i Komisionit të Kategorizimit të Municioneve, "shpërdorim detyre"
12. Zenun Fero, anëtar i Komisionit të Kategorizimit të Municioneve, "shpërdorim detyre"
13. Hysni Coçka, anëtar i Komisionit të Kategorizimit të Municioneve, "shpërdorim detyre"
14. Hilmi Laçaj, anëtar i Komisionit të Kategorizimit të Municioneve, "shpërdorim detyre"
15. Fari Toska, anëtar i Komisionit të Kategorizimit të Municioneve, "shpërdorim detyre"
16. Rezart Tërshana, anëtar i Komisionit të Çmimeve të Fishekëve, "shpërdorim detyre"
17. Besnik Dauti, anëtar i Komisionit të Çmimeve të Fishekëve, "shpërdorim detyre"
18. Agim Babameto, anëtar i Komisionit të Çmimeve të Fishekëve, "shpërdorim detyre"
19. Fiqiret Mato, drejtor i Uzinës Mekanike Gramsh për "falsifikim dokumentesh"
20. Lavdi Shatro, drejtor i Kombinatit Mekanik Poliçan për "falsifikim dokumentesh"
21. Gëzim Oshafi, anëtar i Komisionit të çmimeve të Municioneve të Rënda, "shpërdorim detyre"
22. Denis Hajdari, anëtar i Komisionit të Çmimeve të Municioneve të Rënda, "shpërdorim detyre"
23. Jorgo Mino, anëtar i Komisionit të Çmimeve të Municioneve të Rënda, "shpërdorim detyre"
24. Fatbardh Kuçi, anëtar i Komisionit të Çmimeve të Municioneve të Rënda, "shpërdorim detyre"
Të pandehur në burg
25. Ylli Pinari, ish-drejtori i MEICO-s, "vrasje me dashje, më shumë se njëherë dhe kundër dy ose më shumë personash"; "shpërdorim detyre" e "falsifikim të dokumenteve" në bashkëpunim dhe "shpërdorim detyre" nga Kodi Penal Ushtarak
26. Mihal Delijorgji, administrator i shoqërisë "Albademil", "vrasje me dashje, më shumë se njëherë dhe kundër dy ose më shumë personash" dhe "shkatërrim prone" në bashkëpunim
27. Dritan Minxholi, drejtor teknik i shoqërisë "Albademil", "vrasje me dashje, më shumë se njëherë dhe kundër dy ose më shumë personash"dhe "shkatërrim prone" në bashkëpunim
28. Sokol Gjeçi, ish-inspektori i ndërmarrjes shtetërore "MEICO", "vrasje me dashje, më shumë se njëherë dhe kundër dy ose më shumë personash" dhe "shpërdorim detyre" në bashkëpunim
14 Mars 2009