Gërdeci "qelb" dynjanë

Gerdec 2008

Ajri ne Vore dhe ne gjithe zonen perreth dhjete dite pas shperthimit vazhdon te ruaje eren e rende te barutit dhe municioneve. Autoritetet thone se ndotja vazhdon te jete e rende ne gjithe zonen. Ajri 40% me i ndotur

TIRANË - Pas tragjedisë së Gërdecit, ajri në zonën e Vorës dhe përgjatë autostradës Tiranë-Durrës është rreth 40 për qind më i ndotur se norma. Instituti i Shëndetit Publik bëri matjet për nivelin e ndotjes së ujit dhe ajrit në zonën e Vorës, menjëherë pas ngjarjes së rëndë, ku shpërthyen dhe u shpërbënë në lëndë e mbetje kimike tonelata municione. Vendi në të cilin janë bërë matjet është zona e autostradës, pasi zona në të cilin ka ndodhur shpërthimi është e izoluar dhe konsiderohet zonë e rrezikshme, sepse mund të ketë lëndë eksplozive akoma të paplasura. Kjo është bërë e ditur nga shefi i Laboratorit të Monitorimit të Cilësisë së Ajrit në Institutin e Shëndetit Publik, Agron Deliu, gjatë një interviste që ai dha dje për “Korrierin”. “Deri tani janë bërë matjet e nivelit të ndotjes së ajrit dhe ujit”, tha Deliu. Sipas tij, aty janë bërë matjet e pluhurit të respirueshëm ose grimcave të imëta që identifikohen me blozën nga shpërthimi, oksidit të karbonit ose monoksidit të karbonit, që është helm i cili krijohet nga shpërthimet; bioksidit të azotit që krijohet nga shpërthimet që kanë lëndë me azot dhe bioksidit të squfurit, pasi eksplozivët kanë përbërje squfuri. “Duke e krahasuar me normat e lejuara për ajrin atmosferik në Evropë, me përjashtim të monoaksidit të karbonit, të tjerat kanë dalë mbi normë”, tha Deliu gjatë intervistës. “Por ky nuk është ndonjë tejkalim i jashtëzakonshëm, pasi bëhet fjalë për një tejkalim rreth 30 deri 40 për qind mbi normën”, ka sqaruar ai. Sipas tij, në Tiranë ky pluhur i respirueshëm është 2 deri 3 herë më i lartë se norma e lejuar nga Bashkimi Evropian, ndërsa tek “21 Dhjetori”, “Zogu i zi” dhe tek qendra e Tiranës është 5 deri 6 herë më i lartë. Ndërsa për sa i përket ndotjes së ujit, ai tha se pas bërjes së analizave të para që u bënë tek ujësjellësi dhe vëzhgimeve për ndonjë dëmtim të mundshëm të tubave që mund të ishte bërë nga shpërthimi, u konstatua se nuk kishte asnjë dëmtim dhe uji i depos së ujësjellësit është i pijshëm. “Pasi bëmë matjet e dyta, pamë se ajri tani ka shkuar drejt përmirësimit dhe këtu kanë ndikuar fenomenet atmosferikë, si shiu dhe era. Ndërsa për sa i përket ujit, akoma nuk dihet, pa parë rezultatet e analizave të cilat akoma nuk kanë dalë”, ka shtuar Deliu, duke thënë se edhe për ujin nuk pret ndonjë rezultat negativ. Deliu u shpreh se ISHP-ja tani ka filluar të bëjë edhe matjet e tokës, të cilat sipas tij janë më të rëndësishmet, pasi është toka ajo që i mban helmet dhe substancat e rrezikshme. Pyetjes se cilat janë zonat më të ndotura, Deliu iu përgjigj se kjo do të vërtetohet pasi të hapet zona dhe të bëhen edhe një herë matjet, sidomos për tokën.