Gjakovarët ftohen në Norvegji

Klubi i futbollit Gjakova, në konkurrencën e kadetëve dhe juniorëve, ka marrë ftesë për të marrë pjesë në turneun e futbollit Norge Cup 12, pas suksesit që e arriti në turneun e madh të futbollit në Suedi – Gothia Cup. Këtë e ka bërë të ditur koordinatori i klubit gjakovar, Besmir Haxhikadrija.

“Pas sukseseve që i arriti në kampingun botëror Gothia Cup, KF Gjakova, klub me traditë dhe ambicioz, ka marrë ftesë për pjesëmarrje vitin e ardhshëm edhe në Norge Cup 12, sepse u vlerësua lart ekipi ynë nga protagonistët e organizimit të turneut suedez. Gjakova e shënoi fitoren më të thellë atje, duke arritur rekord në këtë turne, pasi e mposhti ekipin Opssal të Norvegjisë, 11:0”, deklaroi Haxhikadrija, sipas të cilit, përpos Norvegjisë, ekipi i kaltër mund të marrë pjesë edhe në një turne në Kroaci, po ashtu vitin e ardhshëm.

Ndërsa, trajneri Gëzim Daka theksoi se ekipi gjakovar do të synojë gjithmonë të përmirësohet, edhe pse përfundoi në pozitën e katërt në turneun gjigant të Suedisë, ku morën pjesë shumë ekipe nga mbarë bota.

Si rezultat i sukseseve në Suedi, Daka tregoi se udhëheqësit e Gjakovës janë në kontakte me udhëheqësit e Young Boysit për futbollistin e talentuar Leonard Ndrecaj, i cili do të provohet te klubi zviceran në shtator. Koordinatori Haxhikadrija njoftoi po ashtu se KF Gjakova shumë shpejt do të binjakëzohet edhe me klubin shqiptar nga Norvegjia, ‘FK Fortuna’.