Gjasula mungon 3 muaj, probleme me zemrën

Skuadra gjermane Duisburg ka marrë një lajm të keq para fillimit të sezonit të ri në Bundesliga 2. Ajo nuk do të mund të llogaritë për disa muaj në njërin nga lojtarët më të mirë të saj, Jurgen Gjasulën.

Sipas mjekëve të klubit, mesfushori shqiptar me pasaportë gjermane ka një ndezje në muskulin e zemrës, prandaj do të mbetet jashtë fushës së futbollit të pakën për tre muaj.

Ish mesfushori i ekipit zviceran Basel dhe atij gjerman Frankfurt javën e kaluar ishte detyruar t’i lë në gjysmë stërvitjet e skuadrës, pasi gjendja e tij shëndetësore nuk ishte aspak e mirë.

Pas kontrollimeve mjekësore që i janë bërë, ishte konstatuar se mesfushori me prejardhje nga Tirana kishte një infektim të rëndë viral, i cili më pas ka prekur edhe muskulin e zemrës së tij.

“Kjo diagnozë na tregon se kemi vepruar drejt kur javën e kaluar e kemi nxjerrë atë nga vendi i stërvitjeve”, ka thënë drejtori sportiv i skuadrës së Dusiburgut, Ivica Grlic, për mediat gjermane.