Gjermania do të mbështesë Shqipërinë në rrugën e integrimit evropian

Kryeministri Berisha pret në takim parlamentarin e gjerman Kolbow
 
TIRANE - Kryeministri Sali Berisha priti dje në një takim nënkryetarin e grupit parlamentar të Partisë Socialdemokrate në Bundestag-un e Republikës Federale të Gjermanisë, Walter Kolboë.
Në takim u bisedua mbi intensifikimin e bashkëpunimit midis dy vendeve, veçanërisht në fushën ekonomike. Kryeministri Berisha e njohu  Kolbow me masat e marra nga qeveria, që e kanë bërë Shqipërinë një vend shumë atraktiv për biznesin e huaj dhe në këtë kuadër, investitorët gjermanë janë të mirëpritur. 
Koblow theksoi se Shqipëria është bërë një vend shumë i sigurt në rajon dhe kjo është një arritje e rëndësishme e kësaj qeverie.
“Siguria është një avantazh shumë i madh i vendit tuaj, të cilin, theksoi Kolbow,  ne po ia bëjmë të njohur biznesit gjerman”.
Kolbow vlerësoi pranimin e Shqipërisë në NATO si një arritje të madhe, e cila përbën edhe një fondament të rëndësishëm për fitimin e statusit të vendit kandidat të BE.
Ai theksoi se Gjermania do ta mbështesë fort Shqipërinë në rrugën e integrimit evropian.
Kryeministri Berisha vlerësoi edhe bashkëpunimin e frytshëm me Fondacionin Friedrich Ebert dhe fondacionet e tjera gjermane dhe shprehu gatishmërinë për intensifikimin e këtij bashkëpunimi në të ardhmen.