Gjithë bota angazhim për ndihma në Haiti, çifti Pit dhe Zholi dërgojnë 1 mln dollarë

Porto Prince, 14 janar, NOA E gjithë bota
duket e angazhuar për të dhënë ndihmën dhe kontributin e saj për katastrofën që
shkaktoi tërmeti i fuqishëm dje në Haiti.

Sipas të dhënave, vetëm çifti i aktorëve Bred
Pit dhe Anzhelinë Zholi kanë dhënë 1 milion dollarë shpërndarjen e nevojave
bazë ndaj popullatës së goditur nga ky tërmet.

Ndërkaq, Shtetet e Bashkuara të Amerikës,
Franca dhe Britania janë ndër vendet e para që dërguan atje ekipe të shpëtimit
dhe furnizime për të mbijetuarit.
Nga ana e tij, presidenti Barak Obama premtoi ndihmën maksimale të Shteteve të
Bashkuara duke thënë se e ka udhëzuar administratën e tij që të përgjigjet me
veprime të menjëhershme, të koordinuara dhe agresive për të mbrojtur jetët e
mbijetuara.

Ndërsa ndihma e menjëhershme e Bashkimit Evropian
arrin fillimisht tre milionë euro.

Kryqi i Kuq Ndërkombëtar ka deklaruar se janë rreth
3 milionë haitianë, apo një e treta e popullsisë të cilët shfaqin nevojë për
ndihma emergjente.

Lidhur me një fakt të tillë, sekretari i Përgjithshëm
i OKB-së, Ban Ki-Mun tha se 10 milionë dollarë do të dërgohen menjëherë nga kjo
organizatë, në vendin ku nga tërmeti mësohet se kanë vdekur edhe 16 punonjës të
OKB-së.

Tërmeti i fuqishëm prej 7 shkallë Rihter, më i
rëndi në 200 vitet e fundit, shkaktoi shembjen e shumë ndërtesave në këtë vend
të Karaibeve.

n.e/NOA