Greqi, pas raportit të DASH, qëllohet roja i ambasadës amerikane

Athinë, 4 shkurt, 11:52, NOA – Dukej sikur kishte arritur një periudhë qetësie më në fund, pas trazirave të fundvitit të kaluar.

Por situata në Greqi është përshtjelluar sërish pas një akti i cili ka tronditur sot në mëngjes opinionin publik.

Roja i ambasadës Amerikane në Athinë është qëlluar nga persona të panjohur dhe ka mbetur i plagosur.

Ajo që bie në sy është se kjo ngjarje ndodh vetëm disa orë pas botimit të një raporti të Departamentit Amerikan të Shtetit, i cili paralajmëron se në Greqi po rishfaqet terrorizmi.
Sipas këtij raporti, Greqia paraqet një rrezik serioz për shfaqjen e terrorizmit.

Dhe prandaj Departamenti Amerikan i Shtetit i paralajmëron qytetarët amerikanë t’iu shmangen disa zonave të Athinës si lagjia Eksarcia, Omonia, sheshi i Parlamenit dhe sheshi “Aristoteli” në Selanik.

Ndërkaq, nata e djeshme ka kaluar mes sulmesh në Greqi.

“Kufijtë detarë të Greqisë, paraqesin mundësitë për të lejuar futjen e terroristëve në këtë vend”, thuhet në raport.