Gul: Turqia ka potencial

Presidenti i Turqisë, Abdullah Gyl, deklaroi se tani është momenti që Turqia fusë dinamikë në euro-klubin dhe të ndërmjetësojë mes fqinjëve të cilët janë në kontest.

Ai theksoi vendi i tij vazhdon të dëshirojë anëtarësimin në Bashkimin Evropian, pavarësisht krizës së Eurozonës.

Gul, i cili filloi një vizitë treditore në Britaninë e Madhe, deklaroi përpara nisjes se anëtarësimi i vendit të tij do të ishte mbi të gjitha i dobishëm për vetë Bashkimin Evropian, për shkak të "qëndrueshmërisë dhe dinamizmit të ekonomisë turke".

Londra zyrtare e ka mbështetur kandidaturën turke dhe ka qenë një prej nismëtareve të hapjes së bisedimeve në vitin 2005.

Nëse do të anëtarësohet, Turqia do të jetë vendi i parë i Unionit me popullatë shumicë myslimane.

Megjithatë, përpara se një hap i tillë të ndërmerret, mbetet për t’u zgjidhur problemi shumë delikat i Qipros së veriut, ku autoritetet turke kanë instaluar një shtet të njohur vetëm prej tyre, pas një lufte të shkurtër në vitin 1974.

Në kushtet aktuale, duket pothuajse e pamundur që Qiproja, një vend anëtar i BE-së, të japë aprovimin e tij për anëtarësimin e Turqisë.