Hart: Duhet ta fajësojmë veten

Joe Hart thotë se Manchester City duhet ta fajësojë veten pas eliminimit nga Liga e Kampionëve pa e shijuar fitoren në Grupin D. Kampioni anglez pësoi humbje 1:0 të martën mbrëma nga Borussia Dortmundi, për ta mbyllur fazën e grupeve me vetëm tri pikë, duke dështuar po ashtu të kualifikohet në Europa League.

“Ne nuk arritëm të kualifikohemi në të tetën e finales, madje as në Europa League. Donim të fitonim, dhe të shkonim të paktën në këtë eveniment, por nuk ia dolëm mbanë. Ne duhet ta fajësojmë veten për këtë dështim”, deklaroi portieri anglez për Sky Sports pas ndeshjes. ‘Citizens’ do të ketë tash punë me Manchester Unitedin në derbin e Anglisë, i cili do të zhvillohet të dielën, për ta ngushtuar diferencën e pikëve.

“Ne jemi të zhgënjyer me eksperiencën në Evropë, por ishim fantastikë në ligë dhe nuk brengosem shumë. Shpresojmë ta fitojmë kampionatin anglez dhe të jemi në formë sezonin tjetër në Evropë”, përfundoi Hart. Goli i Julian Schieber, i realizuar në minutën e 57-të të ndeshjes ia shoi shpresat ekipit anglez, ndërkaq nga kjo humbje përfitoi Ajaxi, i cili përkundër faktit që u mposht nga Real Madridi, shkoi në Europa League.