Haxhinasto: Mbështesim liberalizimin e vizave për qytetarët e Kosovës

Zv/kryeministri njëherësh dhe ministër i Jashtëm, Edmond Haxhinasto e cilësoi të rëndësishëm procesin e liberalizimit të vizave. Në një takim të zhvilluar me administratën kosovare, ministri deklaroi se dhe Kosova do të jetë së shpejti pjesë e procesit të liberalizimit të vizave, që qytetarët të lëvizin lirë në zonën “Schengen”.
“Kosova duhet të jetë sa më parë pjesë e këtij procesi. Këtë fund viti ju do të keni udhërrëfyesin dhe do të filloni me plotësime konkrete për standardet. Shqipëria mbështet me forcë këtë proces që qytetarët e Kosovës të lëvizin të lirë në hapësirën “Schengen”. Rajoni duhet të integrohet mes vetes dhe në Evropë”, u shpreh ministri.
Po ashtu ai ka bërë thirrje për arritje konkrete të marrëveshjeve mes Kosovës dhe Serbinë, duke shprehur edhe në këtë drejtim përkrahjen që Shqipëria i jep Kosovës. Sipas tij, procesi i dialogut duhet të jetë një dialog me rezultate konkrete, marrëveshje konkrete të cilat zbatohen. “Shqipëria mbështet këtë lloj dialogu me këtë lloj cilësie”, theksoi gjatë fjalës së tij ministri.