Hetemaj në Brescia

Përparim Hetemaj ka vendosur t’i jap fund aventurës së tij te skuadra holandeze Twente. Mesfushori kosovar pritet që karrierën ta vazhdoj në Serie B, respektivisht në klubin e njohur italian Brescia.

Klubi italian pritet që të hënën, kur është edhe afati i fundit për transferimin e futbollistëve, të finalizoj marrëveshjen me 23 vjeçarin, i cili do të kaloj si futbollistë i lirë tek Brescia.

“Pritet që sot (të hënën) të nënshkruaj me Brescian. Kanë mbetur edhe disa detaje të vogla të diskutohen dhe ende nuk e di se për sa vite do të nënshkruaj”, ka thënë Hetemaj ekskluzivisht për Express.

Pas 23 xhirove të zhvilluara në Serie B, Brescia zë pozitën e gjashtë në tabelë, me 35 pikë të tubuara, 7 më pak se lideri Sassuolo.

Anëtari i përfaqësueses U-21 të Finlandës, gjatë verës ishte transferuar nga klubi grek AEK, në Twente. Mirëpo mos përfshirja në ekipin e parë, e ka detyruar Hetemajn të largohet nga klubi holandez.

Me transferimin e Përparimit te Brescia, numri i shqiptarëve në Serie B do të rritet në katër. Aktualisht në ligën e dytë italiane luajnë vëllai i vogël i Përparimit, Mehmet Hetemaj (AlbinoLeffe), Migjen Basha (Frosionone) dhe Edgar Çani (Piacenza).