Holanda, Gjermania dhe Portugalia në një grup në Euro 2012

Holanda, Gjermania, Portugalia dhe Danimarka përbëjnë grupin B të “vdekjes” në Euro 2012, përcaktoi shorti i tërhequr në Kiev të premten. Kampioni në fuqi, Spanja do të ndeshet me Italinë, Kroacinë dhe Republikën e Irlandës në Grupin C. Franca, Anglia, Ukraina dhe Suedia janë kundërshtarë në Grupin D. Ndërsa Polonia, Rusia, Republika çeke dhe Greqia kompletojnë Grupin A.

Holanda, Danimarka, Gjermania dhe Portugalia përbëjnë grupin B, të “vdekjes” në Euro 2012, ka përcaktuar shorti i garës i tërhequr në Kiev. Kampioni në fuqi, Spanja gjendet në Grupin C përballë Italisë, Kroacisë dhe Republikës së Irlandës.

Franca dhe Anglia janë kundërshtarë në Grupin D së bashku me nikoqirin Ukrainën dhe Suedinë. Ndërsa Grupi A konsiderohet më i lehti, ku gjendet bashkë-nikoqiri Polonia, Greqia, Rusia dhe Republika çeke. Ndeshja hapëse e Euro 2012 do të jetë Poloni-Greqi më 8 qershor në Varshavë.

Në mesin e katër grupeve, ai B bie më së tepërmi në sy, meqë gjenden disa prej kandidatëve kryesorë për titull. “Është grupi më i vështirë. Holanda dhe Portugalia kanë futbollistë të klasit botëror. Na presin duele mjaft interesante”, tha selektori i Gjermanisë, Joachim Loew. “Edhe Danimarka është gjithmonë e papërshtatshme, një ekip tipik i garave të këtilla. Ata nuk kanë frikë nga emrat e mëdhenj, kjo i bën ata të rrezikshëm”, shtoi ai.

Ndërsa, mesfushori holandez Wesley Sneijder tha për NOS-TV se: “Është short i vështirë, por i njohim mirë kundërshtarët tanë. Është me rëndësi të fitoni ndeshjen tuaj të parë. Me Gjermaninë dhe Portugalinë si kundërshtarë në vazhdim, dueli i parë kundër Danimarkës mund të jetë vendimtar”. Dy skuadrat e para nga secili grup kualifikohen për në fazën e mëtutjeshme të garës.

Finalja zhvillohet më 1 korrik në Kiev.

Grupi A

Polonia

Greqi

Rusia

Republika çeke

Grupi B

Holanda

Danimarka

Gjermania

Portugalia

Grupi C

Spanja

Italia

Republika e Irlandës

Kroacia

Grupi D

Ukraina

Suedia

Franca

Anglia